Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups.
Per informacion, aquesta cronica comencèt, l’i a mai de dètz-e-sèt ans, lo 8 de junh de 1997. Òsca !
Cronica per aqueu dimènegue 7 de març dau 2015 en lenga nòsta
Per l’Agachaire
Jorn de fremas
Estent qu’aqueste uech de març se celebra mondialament lei drechs dei fremas, e la lucha sempre en devenir per lei daverar, i a un evidéncia dins una cronica en lenga d’òc de parlar des trobadors, e mai que mai des trobairitz. D’autant que la pus granda d’aquestes èra una dòna de la Provença nauta.
Viviá a la fin dau sègle XII e èra comtessa de Dia. S’ei lòngtemps trantalhat sus son identitat, mai siam segurs encuei qu’èra Isoarda de Dia, esposa de Raimond II d’Agout, un des protectors màgers dau Trobar. Lo solet que faguet bastir un palais per aculhir la festa trobadorenca (que se sonava a l’epòca « far taula redonda »), que li diam ara la Rotonda de Simiana.
Avèm gardat d’ela quatre cançons (que d’una sola n’avèm la musica), que n’i a una qu’ei ben lo jorn de ne’n citar en entier son darrier coblet : « Bels amics, avenents e bons, Quora’us tenrai en mon poder, E que jagués amb vos un ser, E que’us des un bais amorós ? Sachatz, grand talent n’auria Que’us tengués en luòc del marit… Amb çò que m’aguessetz plevit De far tot çò qu’ieu volria ! »
Autrament dich : bèl amic, agradiu e bon, quora vos tendrai dins mon poder, e que cougesso ambé vos un ser e vos donèsso un poton amorós ? Sachètz qu’auriáu grand fam de vos tenir en plaça de mon marit… pron que d’abòrd m’aguessiatz promés de far tot ce que voudriáu !
Jean-Yves ROYER
Vorguessiatz laissar un messatge en bas d’article vos aremerciam de passar per l’adreça : jpbaquie@yahoo.fr (per rason d’espams avèm deugut barrar lo forom dirèct : répondre à cet article).
