Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups.
Per informacion, aquesta cronica comencèt, l’i a mai de dètz-e-sèt ans, lo 8 de junh de 1997. Òsca !
Cronica per aqueu dimènegue 24 de mai dau 2015 en lenga nòsta
Per l’Agachaire
La Pandecosta
Encuei, la maja part dau monde conoisson plus gaire Pandecosta que per son diluns, qu’aquò li fai la dimenjada lònga… Autre temps, emai fuguèsse estada sempre cambiadissa, d’abòrd qu’ei ligada a Pascas, èra una fèsta importanta dins nòstes païs. E, coma totjorn dins les tradicions popularas, la celebracion religiosa èra clafida de practicas que li diriam puslèu ara de paganas…
Dins lo païs naut, aqueu jorn d’aquí fasián a Bevons una procession a l’onor de sant Pancier, que tot au lòng de l’an pregavon còntra la colica… A Malameisson èra una bravada en l’onor de sant Clement…
Mai ei subretot les confrariás establidas sota lo títol dau Sant-Esperit que festejavon aqueu dimenge onte, censat, aviá davalat eu en lengas de fuec sus la tèsta des apòstols, dau temps qu’èron acampats. A Champtercier, Fors e Larcha semondián de pans a totes, emai pereu una sopa de favas bolhidas per Champtercier, que manjavon puei sus la plaça. A La Palud de Mostiers, èra de vin e un buou que partejavon. Encar mielhs : a Guilhèstre enribanavon un pareu de buous, florissián un vedèu e lei fasián desfilar avans de se lei manjar. De tot segur que deviá n’aguer per tota la populacion !…
Dins lo païs bas, èron pas tant galhards e s’acontentavon de beure d’aiga e ne’n far beure a sei bèstias, qu’aquela de Pandecosta li gardava la santat…
Jean Yves ROYER
