Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups.
Per informacion, aquesta cronica comencèt, l’i a mai de dètz-e-vuech ans, lo 8 de junh de 1997. Òsca !
Cronica per aqueu dimènegue lo 4 d’ octòbre dau 2015 en lenga nòsta
Encogordats
D’acòrdi, aqueste 4 d’octòbre siam mai au 17 de Vendemiaire de l’annada republicana, jorn onte festeja la cogorda. Un mot qu’a donat en cò nòste un molonàs de dires e d’expressions variadas. Mai n’i a una encuei que seriá dificil de pas ne’n parlar, d’abòrd qu’es una des pus gròsses operacions d’encogordagi que lo monde aguèsse conoissut dins nòste sègle, pasmens bograment encogordaire de mai d’un biais !
Vòlo parlar d’aquela qu’a menat una celèbra marca automobila, simbèu jusqu’aicí de fisança e de seguretat, e que parlava de cada exemplari sortit de ses usinas en dos mots soncament, qu’acabavon totei ses publicitats e acompanhavon sempre sa marca ò son solet logò : « Das Auto ! »
Mai una bèla part de ce que fasiá sa reputacion, èra una tecnica qu’aviá trobat per encogordar aqueles que ne’n crompavon, en fent passar ses engienhs per ben pus pròpres que ce qu’èron !
Lo problèma es que les encogordats son talament nombrós, la cogorda ben tròp gròssa a empassar, e l’encogordagi tant gigantàs que, fin finala, ei l’encogordaire que se vai retrobar lo mai encogordat ; e siam pas segurs que l’i posquèsse sauvar ni carn, ni gruelha, ni grana… Ni qu’aqueste tant bèu carròça daurat, qu’èra la fiertat de l’industria alemanda, se retrobèsse pas lèu coma aqueu de Cendroleta a miejanuech : ren qu’una trista cogordassa !
Jean-Yves ROYER
