Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups. Per informacion, aquesta cronica comencèt, l’i a mai de vint e tres ans, lo 8 de junh de 1997. Òsca !
Cronica, dau 13 de setembre 2020 en lenga nòsta per l’Agachaire
Un 13 de setembre
Lo tretge de setembre de 1875, èra lo tresen jorn dei Fèstas tengudas a Forcauquier per l’inauguracion de la capèla de Nòsta-Dama de Provença, en preséncia d’un molon de personalitats, civilas e religiosas, Mistral en tèsta.
L’après-dinnar, se debanèron de « Juecs floraus », onte bailèron les prèmis dei diferents concors literaris. Per durbir la sesilha, après quauquei mots de Berluc rapelent que sa vila « es subre-tout la noblo e valurouso ciéuta que soustengué la darriero, e sènso tramblun, l’encauso de l’independénci prouvençalo », Aubanèu faguet un discors demorat celèbre, onte diguet : « Escoutas, o gouvernaire, e sachés bèn que pèr tant aut e pouderous que fugués, la lengo prouvençalo es bèn au-dessus de vautre ! Sachés que sian un grand pople, e qu’es plus lou tèms de nous mespresa ! Trento despartamen parlon nosto lengo ; d’uno mar à l’autro mar, di Pirenèu is Aup, di planuro de la Crau i campas dóu Limousin lou meme amour fai batre noste pitre, l’amour de la terro natalo e dóu parla peirau. »
Puei, lo raportaire de la jurada, Crestian de Vilanòva, mandet dau naut de sei 23 ans : « O vàutrei ! que restas au-dessus de la Lèiro, toutei lei fes que duerbi aquéu libre de l’istòri de moun pais, a chasco pajo ensaunousido atròvi voueste noum, e mai que d’un còp mounto de l’amo ei bouco un crid de ràbi… »
Jean Yves ROYER