Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e quatre ans, lo 8 de junh de 1997. Òsca !
Cronica, dau 03 d’octòbre de 2021 en lenga nòsta per l’Agachaire
S’es passat un 3 d’octòbre
Aquesta data es aquela de la naissença d’un escrivan celèbre. Eriam lo tres d’octòbre de 1897. Enfin, sembla que siegue lo pus probable… E onte ? Ne’n sabem tròp ren… N’avem soncament un certificat de baptisme de complasença, que parla d’un dròlle naissut a Madrid lo promier de setembre, e batejat puei lo tres de novembre a Neuilly ! Son paire se seriá sonat Joan Aragon e sa maire Blanca Molin.
La realitat a pas gaire de rapòrt : es aquela d’una naissença adulterina, especialament escandalosa per l’epòca. Fau dire que lo deputat de Forcauquier, Loïs Andrieux, un òme de la grand borgesiá protestanta, maridat ben entendut, aviá fach un enfant a la filha dau sota-prefèct de la ciutat comtala, la joina e bèla Margarida Toucas, d’una borgesiá pas tant granda, mai ela catolica. E tant lei borgés, grands ò pichons, coma les crestians, catolics ò protestants, tastavon pas de rèsta aquela mena d’aventuras…
La futura maire deguet anar escondre sa vergonha e enfantar secretament. E onte aquò ? Mistèri… An parlat de París, ò de Tolon… Aicí l’òm ditz que se passava a Sant-Estève, au pè de la còla de Lura. Totjorn es que sa maire lo faguet puei passar per son pichòt fraire, e lo filhòu de son paire… que li aviá laissat son prenom, Loïs, e mes coma nom de familha Aragon, bensai d’abòrd qu’èra estat ambassador en Espanha.
Jean yves ROYER
Nos an escrich :
Jaume PIETRI : Loís Aragon venguèt soventei-fes dins Var (en particular a La Sanha) monte bessai naissèt. Si sabiá d’origina occitana. Es sota sa bailiá que leis « Editeurs français réunis » (Paris), publiquèron en 1961 « Anthologie de la poésie occtane,
1900-1960 » d’Andrieva-Paula Lafont. L. Aragon ne’n faguèt lo prefaci.