Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e sieis ans, lo 8 de junh de 1997. Òsca !
Cronica dau 11 de junh de 2023 en lenga nòsta per l’Agachaire
Lo polet dau dimenge
Vaquí totara un mes que vos cònto l’aventura qu’èra, de mon temps de dròlle, per n’arrivar a manjar quauque polet un dimenge. D’abòrd qu’aquò èra un dinnar de jorn de fèsta, e qu’auriam jamai agut l’idèia de ne’n coinar un en setmana.
Vos ai adonc parlat de nòste galinier, de la cloca, des poletons, dau travalh per tuar lo polet, lo plumar e lo bedusclar. Après aquò, ma grand ficelava les patas e les alas, ambé la tèsta sota l’una, e lo metiá dins un plat, amb un linge pròpre dessús, au fresc jusqu’a l’endeman.
Lo dimenge, dins la matinada, metiá un pauc de nòste òli d’oliva au fons de la cocòta en fonta, ont aviá tancat dins lo cabucèu, de fonta pereu, dos taps de siure, l’un còntra l’autre en sens contrari, per pas se cremar lei dets en lo prenent. Un còp l’òli pron caud, l’i metiá lo polet, ambé lo fuec pron fòrt, e lo cabucèu de biscanti que tapèsse pas completament la cocòta. Un còp rostit de totei les costats lo salava, baissava lo fuec ò, s’eriam d’ivèrn, plaçava la cocòta sus la cosiniera a bòsc, de la calor pus doça, e que bastava de la pausar onte faliá per aguer lo caud vougut. Ara la cocòta èra ben tapada e, en un bòn besonh, li apondiá un pauc d’aiga que fava caufar dins lo cabucèu, que sa forma o permetiá. Amb aquò pas mai ! Qué volètz apondre a un bòn polet per lo faire melhor que ce qu’es ?
(De seguir)
Jean Yves ROYER