Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups. Per informacion, aquesta cronica comencèt, l’i a mai de vint e sèt ans, lo 8 de junh de 1997. Òsca ! Cronica dau 9 de març de 2025 en lenga nòsta per l’Agachaire
Mes promiers pas
Ara que n’ai acabat ambé ma santonalha e mon santonitge, vèno de
tornar prendre lei « Memòris e Racòntes » mistralencs qu’an
congrelhat lei mieus. Escriu eu : « Atrouvaran, d’ùni que i’a, qu’es
un brisoun enfantouli de counta, coume fau, aquélis enfantoulige.
Mai, après tout, cadun es libre : e à iéu m’es de-bon de reveni, pèr
sounge, dins moun proumié mudage dins moun brès d’amourié,
dins moun carriòu barrulaire… »
E un pauc pus luenh, après aguer contat coma sa maire lo portava
per anar a la messa : « Mai uno fes, aviéu cinq an, à mitan camin
dóu vilage, ma pauro maire me pausè, en me disènt : “Oh ! peses
trop ! aro te pode plus pourta.” »
Ieu èro dejà pron grand quand ma maire me diguet coma un amiga
de la familha me faguet faire mes promiers pas. Pareis que
marchavo totjorn pas, ce qu’auriáu normalament degut faire
despuei de temps. Ela regardet coma assajavon de me faire
marchar, que tombavo avans d’aguer poscut faire un pas.
Demandet alora a ma grand :
– Tatà Ròcha, avètz ben un cachanòse ?
– Vò, mai per de que ?
– Deuriá marchar aqueu dròlle. Mai se o fai pas, ei just qu’a paur…
Prenguet lo cachanòse que li adusiá ma grand e me lo donet, en me
metent una de sei brancas dins cada man, me fent :
– Tèn-te ben, pichòt ! E vai un pauc veire ta grand…
E en ben me tenent au cachanòse, faguèro mes promiers pas…
Jean Yves ROYER
