Resson dei imatges dau Blagaire de l’IEO-06 Jan-Jaume de Niça ven de nen mandar la sieu 33ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Sauvada, la bauma de Terra Amata
Seguissent Chauvet e Lascaus qu’an bastit, per lei sauvagardar, de còpias dei baumas naturalas, la vila de Niça decidèt de faire dau meme per la bauma tubassiera de Terra Amata.
Respondent ais apèus d’ofèrtas de la comuna, un fuble de mestieraus dau canton se metèron candidats per realisar aquest obratge gigantàs. L’estudi escrupulós de totei lei devis, plans, imatges tres D (1), fuguèt menada per lei mai famós especialistas dei traucs : Magali Arna de l’Armari, Alan Corcosson de l’Estaca e Joan Termit de la Fusta (2).
Au darnier torn, fuguèron fin finala, escartats lei carnavaliers de Riquier, e mèstre Blanc, lo porquetier president dau ceucle esportiu dei botiquiers de Niça Vielha, que vesem aquí a l’inspeccion avans l’inauguracion oficiala (3), fuguèt chausit (4).
Resta ais estajans e toristas, tras la dubertura, a congostar aquesta capitada (pan e òcpinel comprés dins lo prètz dau bilhet) !
1. bòrd que s’ausis qu’emé 1 det « aquò vai » e qu’emé 2 dets « mèfi ai degalhs », coma se pòu faire, de lònga, aquela reclama per lei 3 dets : per ajónher la tresena dimension ?
2. per un còp, toteis aquelei qu’an costuma de traucar lei tiradors deis associacions, comunas, despartaments, regions, fuguèron pas convidats au festin ;
3. a l’ora d’ara se saup encora pas se lo gostaron se farà emé de porqueta d’auròchs ò de pòrcs d’Índia escapats dei laboratoris Ronchese ;
4. dau temps que se debanava en plaça Arson, dins lo cadre d’onor, un torneg de tennís-balon, s’ausissiá ansin la sieuna reclama : da Blanc lo saussissòt es pas de can !
PS 1 : lo colet dau Mont Boron estant, aquò ben avans que Mauris lo cantava, clafit d’ostaus, aquela bauma, Terra Amata II, se pòdriá durbir en cò de Canta Còdol …
PS 2 : son quauqueis elegits comunaus a pantaiar que l’estacion Galibardi de la linha dau trambalant novèu fuguèsse tractada dau meme …
JJ de Niça