Resson dei imatges dau Blagaire de l’IEO-06 Jan-Jaume de Niça ven de nen mandar la sieu 38ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Ajudas benvengudas !
Gaire de temps après lo millenari novèu, per lei mieunas estrenas trobèri, dins la pichina sieta dau dessèrt, sota lo toalhon, una polida boita. Majorette, Norev ò Solido me ramenti çò qu’èra escrich subre ela, mai pòdi vos afiermar que lo bati-bati que me prengèt quora descurbèri una pichina cacarineta blua, la famosa veitura de la marca d’en delà de Ren.
Despuei, de lònga, sempre amorosament, n’ai pres grand suenh d’aquesta meravilha.
Toei leis ans visita encò dau pediatre dei miniaturas, puei dei mètges especialisats : lo carburològue per la digestion, l’oculista per lei lumes, lo neurològue per l’electricitat, lo podològue per lei ròdas e sa goma, lo carrocier per lei badòlas, lo dietetician per afinar lo bas regime, l’ORL per la serena, sensa oblidar lo proctològue per lei gas d’escapament … vos disi pas, maugrat lo complement dei mutualas, quant m’a costat la santat, lo benaise d’aquela preciosa maquina de colleccion.
E vos parli manca pas dei sesilhas d’esteticiana per sa pèu, de shampongnarèla per lei tapís, de tenchurier per lei sètis e de tatoatges emé sei calcòmanis e pega-solets !
Per lo manjar e la bevenda, milas atencions : ren que l’òli biòc dei molins d’en ribas de la Mar de Berra, e de benzina rafinada en cò nòstre.
Per son espandiment culturau un abonament ai revistas « auto », « auto mai », « auto-mòto » …
Esperit san dins un còrs san, a pas jamai mancat, ailassada ò pas, empachada ò pas, enraumada ò pas, La Túrbia, Luceram, Sospèu, Tenda e sei corsas de montadas.
Mai vaquí que, dau temps qu’agantava l’acne e leis afaires, a créissut, la minhona, tant lèu que lo bambò d’Andusa o lo grame dau jardin. E quora nos venguèt lo moment, per la bèla damisèla, per leis escaliers de servici, de faire Sant Miquèu, nos metèt dins aquest prefond bren !
Erculs benvenguts per nos escapar de l’endrech !
JJ de Niça