Resson dei imatges dau Blagaire de l’IEO-06 Jan-Jaume de Niça ven de nen mandar la sieu 61ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Mestier : can d’aver.
L’essenciala normalisacion europenca de la longor, dau diametre, dau rai de corbadura, dau pes, de la color, dau perfum, dau gost e dau nombre de granas dins la tèsta (sensa parlar dei flors) de la cogordeta correrèla longa de Niça estent totjorn per camin, un vertadier subjèct de garolhas sensa fin, leis expèrts se son clinats, amb una franca capitada, sus lo bèu, mai rude, mestier de can d’aver.
Coma per lo permés de menar lei veituras, an fach la choisida d’una formacion que deuriá se debanar en dos temps : l’apredissatge de l’amontanhatge, per draias fins leis estivas, au bèu mitan deis escabòts podrà pas se debanar sensa aguer seguit un seriós ensenhament teoric per aquistar mant una competéncias.
Amb lo simulator que vesem aquí lo can aprendrà d’en premier:
– lei comandaments dau pastre de la man, au siblet, a la votz, per acampar, per aparar ;
– lei biais de japar e mordre lei bèstias per lei endraiar come se deu ;
– la triada deis anhèus, anhelas, anoges, arets, bedigas, cadets, fedas, flocats, mòtis ;
– la coneissença deis autrei quatre patas de l’aver : ases, cabras, bòchis, menons, muòus ;
– lei sieus collègas, bastards o “sang pur” (beauceron, briard, labrit, pastor) ;
– lei votz dei campanas, campanetas, cascavèus, clarinas ;
– lei malautiás : calugariá, dova, febras, pesolhs, pianha, ronha de la lana, tremolidassa ;
– lei boneis èrbas : consòuda, milafuelhas (èrba dau talh), sauvi.
Tras lo premier d’abriu venent, toei lei bergiers*, pastres* podran faire enregistrar lei candidaturas de sei cans* en lei mandant (pedigree, experiéncia, japariá de motivacion) encò de Senher Chapacan de Nivèla. 2020 draiòu de l’Estiva. 04444. Castèu Jandebanas.
PS : Toei lei cans que capitaràn pas l’examen teoric seràn venduts coma vertadier moton deis Aups Autas ais Enaciens* veguts amb son GPS escometre lei pastres* sus l’estiva …
* bravei bergieras, pastressas, canhas, Enacienas vos ai pas oblidat ; m’agrada d’acabar lo bilheton sota lo cant dei polidei pastorèlas …
JJ de Niça