Cars amics, cars sòcis,
La dictada occitana dau 2015 si debanèt lo 31 de genoier de matin au Licèu Massena de Niça dins una sala reservada de costuma ai classas preparatòris. Aquesta manifestacion si debanèt en presença de Sénher Jean-Luc GAGLIOLO, conselher municipal delegat au patrimòni e a la curtura niçarda, que rapresentava lo Cònsol de Niça, Sénher Christian ESTROSI ; de Sénher Steve BETTI, encargat de mission Lenga e curtura regionali, que rapresentava Dòna Claire LOVISI rectritz de l’acadèmia de Niça ; de Dòna Isabelle HEAMS provisora ajoncha que rapresentava lo provisor Sénher Henri-Laurent BRUSA.
Es da notar que per lo premier còup a Niça èra un collectiu d’associacions que l’organizava : APLR (associacion dei professors de lenga regionala), CCOc Pais-Nissart e Alpenc, Fédération des Associations Comté de Nice, l’Institut d’Estudis Occitans (IEO-06), Nissart per Tougiou e Oc-Bi .
Lo nòstre president, Joan-Pèire SPIES pilhèt la paraula au nom de toi per aremerciar lu participants e li autoritats presenti en aquesta manifestacion.
Donèt pi la paraula a Steve BETTI que diguèt tot l’interés que madama la rectritz portava a l’ensenhament de la lenga occitana dins la sieu acadèmia. Diguèt tanben que l’ensenhament de l’occitan es au jorn d’ancuei present dins 52 establiments, e qu’en 5 ans la chifra dei escolans que segon aquest ensenhament avia mai que doblat, per arribar aquest an a 2406 escolans dins l’ensenhament public.
Jean-Luc GAGLIOLO si ralegrèt de veire que la chifra dei participants en aquesta dictada occitana èra passada d’un trentenau quauqui annadas en arrier a Niça Bòn-Viatge a mai de 130 ancuei e demandèt tra autre de pensar au moment dei inscripcions de marcar lo sieu pichon en la classa bilingüa francés-niçard dei Portegaliers (Ecole Maternelle Les Orangers).
Pi siguèt au torn de Miquèl de CARABATTA de pilhar la paraula e de presentar lo texto de la dictada trach d’una novèla sieua Lo fantaume de l’aparicida
En fin de dictada cada participant posquèt faire l’auto-correccion e reçaupre en omatge sigue un CD musical : Viatge de PAROPLAPI, sigue lo libre de Miquel de CARABATTA : Lo barròco funeral de paure Mèstre Simon-Pèire Sartre e autri nòvas regalat per l’IEO-06 en meme temps que lo sieu diplòma de participacion.
Lo temps de cambiar de sala, lo monde siguèt convidat a beure lo gòto de l’amistat embé de crostilhants de sòca regalats dai associacions ja citadi.
Da signalar lu mèdias presents : Nice-Matin, Ràdio Nissa Pantai, Azur TV.
Au nom de toi aremerciam lu 130 participants de la premiera dictada occitana organizada per lo collectiu :
Aremerciam tanben lo licèu MASSENA de Niça e lo sieu cap d’establiment per la mesa a disposicion dei doi salas.
