Cars amics, cars sòcis,
La dictada occitana dau 2015 si debanerà aquesta annada au Licèu Massena dins una sala reservada de costuma ai classas preparatòris.
Per lo premier còup a Niça un collectiu d’associacions l’organiza : APLR (associacion dei professors de lenga regionala), CCOc Pais-Nissart e Alpenc, Fédération des Associations Comté de Nice, IEO-06, Nissart per Tougiou e Oc-Bi .
Lo nòstre vici-president, Joan-Pèire SPIES reservèt au nom de toi la sala pròche lo Provisor dau licèu.
Pensi que lu médias seràn presents. Si devem pas mancar. L’an passat l’IEO-06 avia recampat 42 personas e vos demandi de faire lo vòstre possible per èstre encara mai numerós aquest an e sensibilizar lo monde sus l’enjuec d’aquesta dictada.
Cada persona participanta serà premiada sigue per un CD musical, sigue per un libre regalat per l’IEO-06.
La dictada si debanerà sempre dins l’esperit dei annadas passadi d’amistat e de convivialitat. Cadun farà la correccion de la sieu dictada (auto-correccion) en la grafia qu’aurà causida : clàssica ò mistralenca.
Avèm l’esper de recampar un centenau de personas se cadun juega lo juec.
Vos demandi doncas de reservar aquesta data e d’èstre presents emb’ai vòstres amics, lo dissabta 31/01/2015 a 9 oras e mieja davant lo Licèu MASSENA (la dictada es prevista a 10 oras).
Lu sòcis grassencs e colencs de l’IEO-06 son tanben convidats. Lo texto de la dictada serà trach dau libre de Miquèl de Carabatta (Lo barròco funeral…) editat per l’IEO-06 e liejut da Miquèl si-meme. Doncas podètz ja provar de faire de dictadas trachi d’aquest libre.
Ramenti que JP AIPERTO organizèra tanben una dictada a Saorge.
Vos aremercii per la vòstra implicacion e per tot cen que porrètz faire per la capitada d’aquesta fèsta per la lenga occitana.
