Venem de recevre aquesta letra mandada da David Grosclaude, president de l’IEO Nacionau. Dins aquesta letra lo President de l’IEO demanda a cada militant d’escriure, d’interrogar lu candidats ai municipalas e ai cantonalas sus lo question dei lengas « regionali ». L’IEO-06 avia escrich ai 9 deputats e 4 senators dau sieu relarg lo 11 de genoier. Podetz vos inspirar de la nòstra letra (veire lu liames çai-sota) per dire ai canditats cen que volem per la lenga d’òc e li autri lengas de França.
Se lu si metem toi capitarem !
letra dau 11 de genoier ai 9 deputats e ai 4 senators : http://ieo06.free.fr/spip.php?article1061
Cen que volem : http://ieo06.free.fr/spip.php?article116
A tots los militants de l’IEO
La setmana passada, a l’inciativa de deputats de l’UMP e del partit Socialista, d’esmendaments pertocant l’integracion del repècte de la lenga dins la
constitucion èran estat depausats.
Ja, aquelas iniciativas mòstran que la question de las lengas es pas la question d’un partit mes que va al delà.
Se tròba que François Fillon, lo primièr ministre, en persona a demandat al grop UMP de votar pas aquela proposicion e a promés en escambi un vertadièr debat sus la question de las lengas tre la prima.
La promessa foguèt confirmada devant tots los deputats amassats per la ministra de la Justícia Rachida Dati.
Coneissèm plan las promessas dins lo domeni de las lengas mas aqueste còp es estada faita en seguida d’una iniciativa presa un grop de la quita majoritat.
Devèm far en sòrta que la promessa siá tenguda. Aquò vòl dire que totes los biaisses d’intervenir alprèp dels deputats e senators devon èstre utilizats.
Devèm preparar lo debat futur e l’IEO mancarà pas de s’adreçar als parlamentaris occitans per lor dire coma vei l’estatut de las lengas. Fa longtemps qu’avèm formulat de proposicions per donar de drets a nòstra lenga.
O farem dirèctament e tanben en partenariat amb nòstres amics de las associacions que fòrman lo comitat « Anem Òc ! Per la lenga occitana ! ».
Aquel afar mòstra que l’estrategia collectiva a pagat e que las manifestacions de Carcassona e de Besièrs an servit per quicòm. Nos cal contunhar de far pression e de nos recampara a l’entorn de reivindicacions simplas.
Çò que nos servís de basa per dire çò que volèm es justament contengut dins la crida de Carcassona e de Besièrs, la que recampa los actors màgers de la
promocion de la lenga d’òc.
De mai, coma sèm dins de temporadas electoralas, es important per cada militant d’anar interrogar, sensibilizar los candidats a las municipalas e a las
cantonalas.
Mercés a totes per vòstra accion quotidiana.
David Grosclaude, president de l’IEO