Lo 9en congrès de l’Associacion Intenacionala d’Estudis Occitans si debanèt dau 24 au 31 d’avost dau 2008 a l’Universitat d’Aquisgran (Aachen en Alemand, Aix la Chapelle en Francés). Un centenau d’universitaris venguts dau monde entier ( Alemanha, Angletèrra, Aústria, Bulgaria, Croàcia, Espanha, França, Itàlia, Japon, Soïssa, U.S.A , eca… s’èran donat apontament per presentar li sieu darnieri recercas e ne’n faire una comunicacion davant un public de conoissitors attentius.
Una dei salas dont si debanava lo 9en congrès de l’Associacion Intenacionala d’Estudis Occitans
La tòca d’aquest congrès èra tripla : celebrar mai d’un quart de sègle d’existença de l’AIEO, faire un bilanç per la recerca occitana dins aquest periòdo e tanben de desfolopar de perspectivas novèli per l’avenir.
Lo professor Max PFISTER de l’Universitat de Sararbrüken (Alemanha) presentèt en fin de setmana un bilanç positiu dei recercas en matèria de lingüistica de l’ancian occitan per lo periòdo 1998-2008 :
– progrès dins lo sector lexicografic gràcia au COM de RICKETTS e au diccionari d’Auvernhat ancian d’OLIVIER,
– l’edicion dei trobadors a sauput realizar d’òbras grandi (MARCABRU) e melhorar lu sieus instruments (Cançonier G) e lo projèct dei concordanças dei trobadors (PERUGI, DE CONCA),
– La toponomastica es montada au nivèu internacionau (CHAMBON) tanben gràcia a la recerca de l’occitan pretextuau (CARLES),
– Si pòut constatar que l’interés a la recerca occitana es pròpi grand en Itàlia e en Angletèrra, mendre en Alemanha, en França e en Soïssa.
– Li perspectivas avenidoiri semblan favorabli estent que la lingüistica istórica e la recerca dei basas curturali de l’occident tot, an la vòga au jorn d’ancuei.
Lo professor PFISTER Max de l’Universitat de Sararbrüken
Faire un compendi dei toti li comunicacions que si son debanadi dau temps de la setmana seria impossible. Parlerai d’una jova estudianta, Celina BAQUIÉ, de l’Universitat de París-Sorbona que la sieu comunicacion èra « Approche d’un poète occitan de la fin du 20ième siècle : Alan PELHON ». Per nautres Niçards e Provençaus dei Alps-Marítimos, aquò nos fa gaug de saupre qu’un estudi sigue consacrat en aquest poèta de Coarasa (06), qu’avèm toi ben conoissut.
Celina BAQUIÉ, de l’Universitat París-Sorbona
Una partida dau monde presents au congrès dau temps de la pausa café
Parlerai tanben de Naoko SANO, professora a l’Universitat de Nagoya (Japon) que la sieu comunicacion en lenga n’èra « Cal far la fèsta » – l’identitat occitana e la cultura regionala, despí li annadas 1990. Bessai qu’aurem lo plasir de la veire a Niça en fin d’annada 2008, denant una conferença e Coni e Turin (Itàlia).
Naoko SANO, professora a l’Universitat de Nagoya (Japon) e Maria-Joana VERNY (Universitat de Montpelhièr)
Vodrii saludar tanben en aquest congrès la presença de l’Espaci Occitan de Gap, vengut emb’ai sieus libres, sempre lèst a si desplaçar per faire conóisser lo fons documentari dei libres d’òc d’ièr e d’ancuei.
l’Espaci Occitan de Gap tenia banc au congrès de l’AIEO
Per aquelu qu’an pas poscut anar en aquest congrès e que ne’n vòlon saupre mai sus l’AIEO pòdon visitar lo sieu site : http://www.aieo.org/ .
Lu actes dau 9en congrès de l’AIEO seràn publicats en fin d’annada. Vos tendrem au fiu.
