Cars sòcis, cars amics,
Siam urós de regalar per aquelu que posquèron pas participar a la dictada occitana dau licèu MASSENA (e ai autres tanben) lo tèxto de la dictada en li doi grafias (clàssica e mistralenca) seguit de la sieu traduccion francea.
Podètz provar de la tornar faire au vòstre, perqué pas !
Ramentam qu’aquesta manifestacion siguèt organizada per un collectiu d’associacion :
Article de Nice-Matin dau 29/01 : http://ieo06.free.fr/spip.php?article2861
Article de Nice-Matin dau 01/02 : http://ieo06.free.fr/spip.php?article2865
Lo rendut-còmpte de l’IEO-06 : http://ieo06.free.fr/spip.php?article2863
Dictada occitana dau 31 de genoier dau 2015, licèu Massena, Niça/Nissa.
Trach de « Lo fantasma de l’Aparecida » in « Lo barròco funeral de paure Mestre Simon-Pèire Sartre e autri nòvas », Miquèl de Carabatta, IEO 06, 2014.
Grafia clàssica
[…]
Mi va picar en lu braç, au ralentit, coma au cinemà, « chabadabadà ». La mi vau tenir agrumicelada, aquí. Vau nasear un mosc que mi remembrerà tot, dau temps que sentirai lo sieu ventre caud e lo sieu piech tendre si pressar còntra de ieu. Vau faire córrer li mieu mans sus d’aquela seda negra, veire l’autra man d’aqueu païsatge coma lu bòrnis : l’espaneant de la mieu pauma, dei mieus dets… lo monde si va sarrar en lo relarg dei nòstres braç quora li sieu mans toqueràn la mieu còta, esguilheràn sus lo mieu lòmbo… Aqueu mai de roman a la vai que t’abuti !…
– Siáu desconsolada, ai pas tròup lo temps. Devi anar passar un exame bèl aüra… per milhorar lo mieu estatut professionau. Non mi pòdi metre en retardi, cau que li vagui !
– A ! ben segur que…
Una baieta a l’enrabiada, just lo temps de sentir un pèssegue mi fregar li gautas. Es ja en la sieu berlina, tot bèu just li pairi respòndre :
– Siáu aquí au collègi, tot l’an, es aisat de mi jónher… E bòna florida, alora !
En galèra ! es ja luenh quora m’enavisi que li ai manco demandat de mi « remembrar lo sieu pichin nom », de mi dire dont està. Ren dau tot… Mas qu es, Bèla Vierge, qu es ?! Ò per ben dire, qu èra… […]
Grafia mistralenca
Mi va picà en lu bras, au ralentit, couma au cinemà, « chabadabadà ». La mi vau tenì agrumicelada, aquì. Vau naseà un mousc que mi remembrerà tout, dau temp que sentirai lou siéu ventre caut e lou siéu piech tendre si pressà couòntra de iéu. Vau faire courre li miéu man sus d’aquela seda negra, vèire l’autra man d’aquèu paisage couma lu borni : l’espaneant de la miéu pauma, dei miéu det… lou mounde si va serrà en lou relarc dei nouòstre bras quoura li siéu man toqueran la miéu couòta, esguilheràn sus lou miéu lòmbou… Aquèu mai de rouman a la vai que t’abuti !…
– Siéu descounsoulada, ai pas tròu lou temp. Devi anà passà un esame bel ahura… per milhourà lou miéu estatut proufessiounau. Noun mi pouòdi metre en retardi, cau que li vagui !
– A ! ben segur que…
Una baieta à l’enrabiada, just lou temp de sentì un pèssegue mi fregà li gauta. Es ja en la siéu berlina, tout bèu just li pairi respouòndre :
– Siéu aquì au coulegi, tout l’an, es aisat de mi jougne… E bouòna flourida, aloura !
En galèra ! es ja luèn quoura m’enavisi que li ai màncou demandat de mi « remembrà lou siéu pichin noum », de mi dire doun està. Ren dau tout… Ma qu es, Bèla Vierge, qu es ?! O per ben dire, qu èra… […]
Traduccion francea
[…]
Elle va me tomber dans les bras, au ralenti, comme au cinéma, « Chabadabada ». je vais la tenir pelotonnée, là. Je vais respirer un musc qui me rappellera tout, pendant que je sentirai son ventre chaud et sa poitrine tendre se presser contre moi. Je vais faire courir mes mains sur cette soie noire, voir l’autre côté de ce paysage comme les aveugles : le frôlant de ma paume, de mes doigts… le monde va se refermer dans l’espace de nos bras quand ses mains toucheront ma nuque, glisseront sur mes reins… Ça aussi, comme roman à quatre sous !…
– Je suis désolée, je n’ai pas trop le temps. Je dois aller passer un examen juste maintenant… pour améliorer mon statut professionnel. Je ne peux pas me mettre en retard, il faut que j’y aille !
– Ah ! bien sûr…
Une bise à la va vite, juste le temps de sentir une pêche me frôler les joues. Elle est déjà dans sa berline, j’ai à peine le temps de lui répondre :
– Je suis au collège, toute l’année, c’est facile de me joindre… Et bonne chance, alors !
Mince ! elle est déjà loin quand je me rends compte que je ne lui ai même pas demandé de me « rappeler son prénom », de me dire où elle habite. Rien du tout… Mais qui c’est, Belle Vierge, qui c’est ?! Ou plutôt, qui c’était… […]
