Fa un moment que n’audetz bessai parlar d’aqueu projècte de lançar de preservatius en occitan. Despí la jornada dau « Total Festum » a Montpelhièr lo 27 d’octòbre, lu preservatius 100% occitanofònos son aüra oficialament lançats. Lo » conselh de la joventut » a fach un primièr tiratge de 4000 preservatius emballats polidament en una borseta facha per la marqua » Adishatz « .
Lu preservatius 100% occitanofònos son aüra oficialament lançats
Aquestu preservatius son distribuits gratuitament dau temps de manifestacions dont lo Conselh de la Joventut es present. Li associacions que ne’n faràn la demanda pòdràn finda aver d’aquesti capòtas a distribuir. Demandan basta qu’aquela « distribucion si fague a de joves, e s’es possible de faire un resson mediatic d’aquesta distribucion. Aquò li permete d’aver de retorns e sobretot de mostrar l’eficacitat de la campanha per la tornar lançar e aver d’ajudas tornamai. » 
Vist lo sieu succès, lo primièr tiratge dei preservatius será d’en primier per li associacions membres dau « Conselh de la Joventut ».
Aquestu preservatius son basta un tròç d’una campanha de prevencion contra li Malautias Sexualament Transmissibli (M.S.T.). Son acompanhats adonc :
· D’afichas
· De prospectus explicant lu diferents risques dins una relacion sexuala non protejada… e un lexic de basa en occitan dins mai d’una circontança…
· Una expausicion mostrant l’occitan coma vector curtural de l’amor despí l’Atge-Mejan embé de citacions literari sus lo biais d’exprímer lu sieus sentiments, lu diferents dangiers d’una relacion sexuala non protejada e lu diferents mesos de se protejar.
Dont aver l’equipament dau perfèct occitan ?
L’apontament venent serà lo dissabta 25 de novembre dau 2006 a Carcenac-Peyrales (Comuna de la Barraca- 12). Li aurà tra autres un concèrt de LOU SERIOL e lo Conselh de la Joventut serà aquí per distribuir sabètz que !