Da notar sus l’agenda : SEREM TOI A MONTPELHIER, LO 24 D’OCTÒBRE 2015 :
L’i serem :
– Per la lenga occitana !
– Per la diversitat !
– Per la tolerança !
Un còup de mai cau afirmar lu drechs de la nòstra lenga.
La manifestacion dau 24 d’octòbre a Montpelhier deu èstre un messatge en aquelu que refudan lo drech a la lenga occitana d’existre e que capisson/comprenon pas que la diversitat lingüistica es un element basic de la democracia.
En lo 2009, una granda bandeiròla diía a Carcassona « La lenga que parlam es patrimòni de l’umanitat ». Es una frasa que deuria èstre una banalitat mas es pas lo cas dins lo nòstre país. La lenga occitana es pas reconoissuda e lo sieu drech a èstre transmesa e desfolopada existe pas vertadièrament.
Maugrat aquò, d’iniciativas si son desfolopadi pauc a pauc per la mobilizacion dau monde associatiu, embé l’ajuda de quauqui collectivitats. Gràcias a la mobilizacion dei militants d’avançadas son estadi possibli dins mai d’un domani.
Mas sabèm ben que cen qu’avèm ganhat es en permanença remés en causa. Es lo cas per l’escòla. Per d’unu, toi lu pretèxtos son bòns per destrúger cen qu’es estat bastit en favor de l’occitan. Dins lu mèdias publics, lo pauc qu’avèm es pas jamai assegurat de poder contunhar. De disposicions discriminatòris son messi en plaça per de mèdias privats e la presença de la lenga dins l’espaci public es atacada basta quora si presenta sota la forma minimalista d’un panèu d’intrada d’aglomeracion. E d’exemples ne’n podèm citar mai.
Cau èstre numerós a Montpelhier per dire en aquelu que refudan a la nòstra lenga e a la nòstra cultura la sieu plaça legitima que l’occitan es patrimòni de l’umanitat. La nòstra responsabilitat es grana, per li generacions que venon, per la diversitat qu’es portairitz de dialògue tra li culturas.
Devèm faire passar lo messatge ai responsables politics : avèm una plaça dins lo monde que si bastisse. La nòstra lenga a lo drech au respècte perqué es una partida dau patrimòni comun dei fremas e dei òmes que vivon sus la nòstra planeta. Es un element que nos ajuderà a pensar e a imaginar lo nòstre avenir.
Anem Òc ! Per la lenga occitana ! Montpelhier 24 d’octòbre dau 2015.
COORDINACION «Per la lenga occitana !» IEO – Institut d’Estudis Occitans, Calandreta
COMUNICAT / COMMUNIQUÉ / Messatge bilingüe
Davant lei fenomèns de regression e lo perilh de mai en mai gròs que menaça la lenga, la « Coordinacion per la lenga occitana » (IEO/Calandreta) rampèla a una granda mobilizacion per l’occitan lo dissabte 24 d’octòbre de 2015 a Montpelhier
Contacte : coordinacion.perlengaoccitana@gmail.com
« Anem Òc ! Per la lenga Occitana ! »
Devant les risques de régression et le péril de plus en plus grand qui menace notre langue la « Coordinacion per la lenga occitana » (IEO/Calandreta) appelle à mobilisation pour l’occitan le
samedi 24 octobre 2015
à Montpellier
Contact : coordinacion.perlengaoccitana@gmail.com
« Anem Òc ! Per la lenga Occitana ! »
