A 12 qm de Niça, en direccion de l’Itàlia, vos podetz passejar l’annada tota sus lo Cornís Grand en lo parc natural forestier dipartemental de la « REVERE ». La passejada dura 2 oras de temps (anar-venir) e presenta minga dificultat. Esquasi ren en denivelat : quauqu dezenaus de metres. Podetz utilizar sigue la carta Michelin n° 195, sigue la carta IGN 1/25000 n° 3743 oest : Niça-Antíbol-Mónegue.
Per li anar quitatz Niça per lo Cornís Grand, en direccion dau Mónegue. A l’encrosament dau Còl d’Eza, viratz a seneca sus d’una rota estrecha que pua, dont li es escrich « Astrorama ». Puatz 3-4 qm e parcatz la veitura pròch dau centre de dressatge de cans-guidas per bòrnis. Es aquí que comença la caminada. De pas mancar una pròpi bèla vista sus Eza e Cau Ferrat.
Anatz encara avant doi-tres cents metres e arribatz davant lo Fòrt de la « Revere »
Lo camin empeirat es marcat de jaune e mena a la Cima de la « Fòrna » (40 a 50 minutas), aquí tanben una bèla vista sus li montanhas dau Mercantor e Turbia fins a l’Itàlia.
Per lo retorn pilheretz lo meme camin en sens contrari, ò una draia a man drecha qu’es marcada « draia de descuberta geològica » e que mena tanben au Fòrt de la « Revere ». Da notar tot au lòng dau camin d’escritèus pedagogics.
Se capitatz de li anar lèu de matin, per temps clar si vé la Còrsica, ò puslèu lo sieu reflés.
