95 sòcis de l’IEO-06 dei 5 cors d’occitan de Niça (Sant Ròc e Bòn-Viatge nivèus 1 e 2) de Drap e de Còntes, festejèron la fin de l’annada escolara a Bergueàs lo dimarç 19 de junh dau 2012. Joan-Pèire SPIES vos dona la recepta per faire una bèla fèsta.
Recepta per faire la fèsta
Pilhatz un luec plan e quiet en riba de Palhon…
Metètz-l’i quatre-cinc juecs de bòcha, un cabanon, un forn a la sosta, quauqui taulas…
Recampatz lo monde dei cors de lenga de Niça, de Còntes, de Drap, li sieu amigas e lu sieus amics, li sieu vesinas e lu sieus vesins…
Sonatz lo Choa, e sa frema, fin que s’en tornan lèu de vacanças, per que vengue ‘mé la sieu banda dau clòs n’alestir un aperitiu e un past convivau e sobretot per nen coïnar de placas de sòca meravilha a ofa…
Metètz au mitan la chorma de teatre de l’atalier de l’IEO per jugar una peça de Raols Nathiez, « La Nuech de la Sant Pèire » que vi farà escracanhar dau rire ‘mé lu sieus personatges estrambordats…
Au far de la nuech, entaulatz-vos per vi repauar de tot lo trampin de l’annada, cu charrant, cu ne’n diguent una, cu pilhant de fòtos, cu faguent de projècts…
Sortètz la quitarra, la jorgina e lo saxofòn…
Fètz venir sus lo pontin lo còro dei escolans dau cors de Còntes per nen cantar doi-tres…
Acabatz la serada en cantant sota dei estèlas que aüra lusisson au ciel…
Nen resta basta a remerciar toi aquelu qu’an fach aqueu bòn moment de convivialitat, a li dire « Bòni vacanças » e « A si reveire a la rentrada !»
Joan-Pèire SPIES
Per veire de tròç de la peça La Nuech de la Sant Pèire jugada per l’atalier teatre de l’IEO-06 a l’AG de l’IEO-Federal : http://www.youtube.com/watch?v=NIoyNy_0hcs&feature=youtube_gdata_player