Amics occitans, la cronica Ribon-Ribanha d’ancuei, titrada “Viatge a Florença”, v’es prepauada da Joan-Marc RABIER soci de l’IEO 06. Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
“La garderem ribon-ribanha, nòsta rebèla lenga d’Òc !”
Viatge a Florença
« La pintura es una poesia que se vei e non s’ausís… »Leonardo da Vinci
MONTAIGNE, STENDHAL, CHATEAUBRIAND…mantuns l’avian fach….
De qu’avián fach? Lo Grand Torn, La Virada Granda ! Aquel viatge en Euròpa subretot en Itàlia èra, autres còps, pels sabents, artistas e escrivans, una etapa initiatica.
Lo mès passat me tocava a ieu, pas tant saberut qu’aquò, per èstre modesta. Partiguèri amb lo program europenc COMENIUS. Adonc, un grand mercé a l’Euròpa que finança aqueles sejorns culturals !
Uèi, es pas una «aventura totala» pels còrs e l’esperit coma lo porriá dire lo Professor italian Luigi Lombardi VALLAURI que faguèt, dins una bibliotèca de Florença, una conferéncia suls viatges …Pr’aquò per citar un pauc aquel filosòfe eretic (aguèt de problèmas amb lo Vatican) e benlèu un pauc occitan 
(perque se diguèt originari de la Val Maira), pòdi confessar qu’aqueste viatge dins la Florença de la Renaissença (1400-1600) me faguèt ressentir un «stupore» e sortiguèri vertadièrament dau «banale» de la vida vidanta . De costuma, Mèstre VALLAURI parla de tot aquò pels « viaggi integrali » que se fan d’a pè dins los deserts ò las montanhas dau Nepal amb la biaça plan plena sus l’esquina !
Tornam a Florença, capitala europèa dels Bèls Arts, segunda ciutat mai rica (amb París) a l’Edat Mejan: aquí un jorn de la fin del sègle XIV, del temps de Còsme l’Ancian de Medici, dos pintors nomenats GIOTTO e CIMABUE decidèron de cambiar lo biais de representar lo sacrat e lo divenc. Donèron un aire de realitat als sants, profètas e autres membres de la familha de Jèsus Crist. Se tornavan descobrir tanben l’Antiquitat romana e grèca.
A lor seguida, un sculptor, GHIBERTI creèt pel baptistèri, a la debuta del sègle XV, la Pòrta del Paradís : aquò es l’acte fondador de la Renaissença artistica ! E per ajudar tots los artistes, BRUNELLESCHI, l’arquitècta, imaginèt de dessenhar paisatges e ostals amb de perpectiva ! Durbiguèron tots ensems, amb los sòus de las corporacions de mestièrs, mercants e banquièrs, un novèl temps, lo temps de la Renaissença…..
Las gents de l’epòca, òmes e femnas, de la cort de Laurenç lo Manific ò de las carrièras de Florença, se retrobèron, caras e vestits pinturats, suls tablèus e sus las frescas de tantas glèisas, capèlas e palaises.
Per tornar a ieu, escolanejèri plan : lo matin, leiçons d’Istòria de l’Art e lo tantòst visitas guidadas de glèisas, musèus e monuments. E de glèisas ; n’i a ! O vos pòdi assegurar! Lo Dòna, Santa Crotz, Santa Maria Novèla, Sant Laurenç, San Esperit, Santa Maria del Carmèl….per ne citar que las mai bèlas ! A te far virar….Dedins a visitar s’i pòt passar un briu de temps juscas a n’aver a la fin un sadol coma lo FLAUBERT en viatge en Egipta mas aquò es una autra istòria….
Nos anam arrestar sus quauques personnatges que se pòdon trobar gaireben de pertot: l’Adam e l’Eva ; lo Jèsus Crist, sus la crotz ò… endacom mai ; la Verja Maria ; lo David nud e tot solet e fin finala la Venús nuda tanben, e plan sovent solèta.
Començam per l’Ancian Testament amb l’Adam e l’Eva. Vos aconselhi doncas la visita de la capèla Brancacci dins la glèisa de Santa Maria del Carmèl. Aquí los penheires MASACCIO , MASOLINO e LIPPI los rapresentèron en tota nuditat. L’Eva de la Tentacion es talament polida e talament nuda qu’es de bon comprene perqué l’Adam ne foguèt destimborlat ! Cossí èra possible de pinturar una creatura tant atrasenta e completament nuda dins un luòc crestian ?! Aquò me meravilhèt….Lo monde de Florença a la Renaissenca èra de segur fòrça dubèrt !
Per las Crosificasons, se la crotz es totjorn de fusta , de visatges pel Jèsus n’i a de tota mena, de polits, d’agradius, de caruts, de patissents, de sanguinhós, de drechs, de tombadissents…; lo còrs es magre ò redolent ; las cambas, regdas ò plegadas – de mai en mai plegadas amb lo sègle que passa ….e aquò li balha a la fin un aire de dançaire tragic !
La Maria, – vierja ? degun lo saup ..levat lo Josèf.- es de pertot, en magestat, de còp amb son pichòt, ò amb un anhèl ò amb la sieuna santa familha ò d’amics venguts de luenh, los Reis Màgers.
Per MICHELANGÈL es pas un maria-meca amb sa polida cara de filha de la campanha e per LEONARDO DA VINCI es una bèla borgesa alusentida, assetada a l’entrada de son palais, agachant l’arcangèl ailat, lo Gabriel, que li ven anonçar une novèla qu’es pas de creire ….
Un autre eròi de l’ancian testament que se vei de pertot es lo David ! Goliath, gaire….Sonque a Florença n’i a un sus la Plaça de la Signòria (la còpia de l’autre), un autre al musèu de l’Acadèmia (aquel d’aquí es lo vertadier!), un tresen al musèu Bargello.
Los esculptors MICHELÀNGEL e DONATELLO faguèron benlèu un concors ?….. Aquel gigant, nud coma un vèrm, amb de « joièus de familha » de bona talha e… de darrièr un cuol manific, èra segurament un bon exemple per las leiçons d’anatomia e deviá donar 
una estèla de plaser a totas la filhas (e mai) d’aquel temps….. que passavan per la plaça ! Vos disi pas qu’avián previst a la debuta de lo quilhar sus lo teulat de la catedrala…Aquò èra refusat pel clergat quand lo veguèron !!!!
Anam daissar lo Testament, novèl o ancian, per parlar d’ una divinitat completament pagana, una divessa de l’Antiquitat, la Venús. Per la veire, cal anar visitar la Galariá dels Offices, dubèrta a la demanda de Francés de Medici dins las annadas 1580. Era lo primier musèu ! Dedins s’i pòt passejar tot lo jorn e i passar aital d’oras intensas a agachar pinturas e esculpturas .
Las Venús son mai d’una ! Me’n vau començar amb la primièra, de BOTTICELLI, aquela de la Naissença : una beutat a l’antica, als pèls ros, que te fa tremolar e ressautar !
Puèi, anatz veire la Venús dels Medicis, una còpia renaissença d’una estatua grèca ò romana. E se n’avètz pas pron, un pauc mai luenh, es de bon gost de s’arrestar denant la Venús d’Urbino de TITIEN : una polida bilhauda, nuda e alongada sus un lièch, t’agacha – solament TU al mitan d’un fum de personas !-d’un aire coquinòt ! Aquò te fariá lo cap coma a STENDHAL al sègle XIX….
Aquel viatge foguèt una «aventura» umana per l’esperit e la vista. Tornèri de Florença los uèlhs plens de meravilhas, en tot somiar d’aquèla epòca dubèrta a la creativitat e a l’amor de l’Art, esperant de la nòstra una meteissa umanitat. Aquò serà benlèu amb la cultura que l’òm se salvera de la crisi actuala…..Del bèl vendrà lo ben !
Jean-Marc RABIER
Octòbre 2012
Voyage à Florence
«La peinture est une poésie qui se voit et ne s’entend pas…» -LEONARD DE VINCI
MONTAIGNE, STENDHAL, CHATEAUBRIAND… nombreux l’ont fait…
Qu’ont-ils fait ? Le Grand Tour, La Grande Virée ! Ce voyage en Europe, principalement en Italie, était autrefois pour les savants, artistes et écrivains, une étape initiatique.
Ce fut mon tour le mois dernier même si, pour être modeste, je ne suis pas tant savant que ça. Je suis parti grâce aux programmes européens COMENIUS. Donc, un grand merci à l’Europe qui finance ces séjours culturels !
De nos jours, ce n’est pas une «aventure totale» pour le corps et l’esprit comme le dirait le professeur italien Luigi Lombardi VALLAURI, qui fit, dans une bibliothèque de Florence, une conférence sur les voyages … Cependant pour citer un peu ce philosophe hérétique (il eut des problèmes avec le Vatican) et peut-être un peu occitan (puisque originaire – nous dit-il – de la Val Maira), je peux avouer que ce voyage dans la Florence de la Renaissance (1400-1600) me fit éprouver une « stupeur » et je sortis vraiment du « banal » de la vie quotidienne. D’habitude, Maître VALLAURI parle de tout cela pour les « voyages intégraux » qui se font à pied dans les déserts ou les montagnes du Népal, avec sur les épaules un sac à dos bien plein.
Revenons à Florence, capitale européenne des Beaux-Arts, deuxième ville plus riche (avec Paris) au Moyen Age : ici un jour de la fin du 14e siècle, du temps de Côme l’Ancien de Médicis, un peintre nommé GIOTTO décida de changer la façon de représenter le sacré et le divin. Il donna un air de réalité aux saints, prophètes et autres membres de la famille de Jésus-Christ. On redécouvrait également l’Antiquité grecque et romaine. A sa suite, un sculpteur, GHIBERTI créa pour le baptistère, au début du 15e siècle, la Porte du Paradis : c’est l’acte fondateur de la Renaissance artistique ! Et pour aider tous les artistes, BRUNELLESCHI, l’architecte, imagina de dessiner paysages et constructions en perspective ! Ils ont ouvert tous ensemble, avec l’argent des corporations d’artisans, de marchands et banquiers une ère nouvelle, la Renaissance.
Le monde de l’époque, hommes et femmes, de la cour de Laurent le Magnifique ou des rues de Florence s’est retrouvé, visages et tenues peints, sur les tableaux et sur les fresques de tant d’églises, chapelles et palais.
Pour revenir à moi, j’ai fait le bon étudiant: leçons d’histoire de l’art le matin et visites guidées d’églises, musées et monuments l’après-midi. Et les églises pullulent ! Je peux vous le garantir ! Le Dôme, Sainte Croix, Sainte Marie Nouvelle, Saint Laurent, Saint Esprit, Sainte Marie du Carmel …pour ne citer que les plus importantes. A te faire perdre la tête…A l’intérieur on peut y rester des heures, à visiter jusqu’en avoir marre comme FLAUBERT lors d’un voyage en Égypte mais ceci est une autre histoire….
Nous allons maintenant nous intéresser à quelques personnages que l’on peut trouver presque partout : Adam et Ève ; Jésus-Christ sur sa croix ou…ailleurs ; La Vierge Marie ; David nu et tout seul et enfin Venus, nue également et souvent seule .
Commençons par l’Ancien Testament avec Adam et Ève. Je vous conseille donc la visite de la chapelle BRANCACCI dans l’église de Sainte Marie du Carmel. Ici les peintres MASACCIO, MASOLINO e LIPPI les représentèrent dans leur « nudité toute nue ». Ève de la Tentation est tellement belle et si nue que l’on comprend aisément pourquoi Adam en perdit la tête. Comment fût-il possible de peindre une créature si attirante et entièrement nue dans un lieu chrétien ! Cela m’émerveilla….Les habitants de Florence à la Renaissance étaient plus que sûrement très ouverts !
Pour les Crucifixions, si la croix est toujours de bois, les visages de Jésus sont divers et variés, des beaux, des agréables, des renfrognés, des souffrants, des sanglants, des droits, des retombants… ; le corps est maigre ou replet ; les jambes, raides ou pliées – de plus en plus pliées à mesure que le siècle avance…et cela lui donne à la fin un air de danseur tragique !
Marie, – vierge ? nul ne le sait….sauf Joseph – est partout, en majesté, quelquefois à l’enfant, avec un ange, en sainte famille ou avec des amis venus de loin, Les Rois Mages. Pour MICHEL-ANGE ce n’est pas une sainte nitouche avec son beau visage de fille de la campagne et pour LEONARD DE VINCI c’est une belle bourgeoise, à la parure brillante, assise à l’entrée de son palais, regardant l’archange ailé, Gabriel, qui vient lui annoncer une nouvelle impossible à croire…
Un autre héros de l’Ancien Testament que l’on voit partout c’est David ! Goliath pas si souvent….A Florence seulement il y en a un sur la place de la Seigneurie (la copie de l’autre), un autre au musée de l’Académie (celui-ci est le vrai !), un troisième au musée Bargello. Les sculpteurs MICHEL-ANGE et DONATELLO firent-ils peut-être un concours ?…Ce géant, nu comme un ver, avec des « bijoux de famille » de bonne taille et….au derrière un cul magnifique était sûrement un bon exemple pour les leçons d’anatomie et devait donner un éclat de plaisir à toutes les filles (et plus) de ce temps-là….qui passaient sur la place ! Je ne vous dis pas qu’il était prévu à l’origine de le placer sur le toit de la cathédrale…Refusé par le clergé quand ils le virent !!!!
Nous allons abandonner le Testament, nouvel ou ancien, pour parler d’une divinité complètement païenne, une déesse de l’Antiquité, Venus. Pour la voir, il faut aller visiter la Galerie des Offices, ouverte à la demande de François de Médicis dans les années 1580. C’était le premier musée !
A l’intérieur, l’on peut s’y promener toute une journée et y passer ainsi des heures intenses à admirer peintures et sculptures. Des Vénus, il y en a plusieurs ! Je vais commencer par la première, peinte par BOTTICELLI, celle de la Naissance : une beauté antique, aux cheveux roux, qui t’émeut et te transporte ! Ensuite, allez voir la Venus des Médicis, une copie renaissance d’une statue grecque ou romaine…Et si vous n’en avez pas assez, un peu plus loin, il est de bon goût de s’arrêter devant la Vénus d’Urbin de TITIEN: une belle coquine, nue et allongée sur un lit TE regarde – seulement toi au milieu d’une foule de visiteurs ! – d’un air coquin ! A t’en faire perdre la tête comme à STENDHAL au 19e siècle…..
Ce voyage fut une « aventure » humaine pour l’esprit et le regard. Je suis revenu de Florence des merveilles plein les yeux, rêvant de cette époque ouverte à la création et à l’amour de l’Art, espérant de la nôtre une égale humanité. Cela sera peut-être avec la culture que l’on se sortira de la crise actuelle….Du beau viendra le bien !
Jean-Marc RABIER
octobre 2012