Carta pòstala de vacanças : La Clarea.
Carta postala de vacanças : La Clarea.
Siam partits en vacanças lo 4 d’aost per anar en la valada de la Clarea.
Despi d’annadas mi pantaiavi de l’i anar. La rason ? La lectura d’un libre, aqueu d’Emilia Carles : « Une soupe aux herbes sauvages ».
Aquesta comba es una meravilha de per lu sieus paisatges, la flòra e la fauna alpini, li sieu glèias e capèlas pintadi d’afrecas dau sègle XVI per d’uni, sensa denembrar li numeroi meridianas que son aquí per vos remembrar lo temps que passa.
La valada es lònga e larga, coma lo mi pensavi. Lo camin que l’i mena es estrech. Mai d’un còup, per traversar lu vilatges si devem arrestar a de fuecs tricolòrs per laissar lo passatge en aquelu que van en lo sens contrari, es de dire.
La Clarea s’atròva 18 qm de Briançon. Lu vilatges an sauput conservar la sieu autenticitat. Nautres si siam fermats a Robion, masatge de Nevacha (1620m), darnier vilatge denant li montanhas que tutejan per d’uni, lu 3 000 mètres d’autessa.
Aquí es lo paradís dei caminaires, per cu li agrada de caminar. Per aparar la montanha, un servici de navetas es estat mes a disposicion dau monde que devon laissar la sieu veitura a un parc partent de dètz oras de matin. Totun, seria impossible de s’encrosar sus d’aquestu camins estrechs que menan ai draias de montanhas.
Laus de la Clarea.
Lo premier jorn aneriam au laus de la Clarea (2433m) que fa confin embé Savòia. Una bòrna sarda es aquí per ne’n testimoniar un pauc après dau laus.
Fagueriam lo rescòntre d’un pastre e dau sieu aver, fòrt de mai de 500 tèstas.
Lo segond jorn aneriam ai laus dei Muandas : lo Lòng (2387m) e lo Redond (2446m) partent dau refuge dei Draieras. Lu jorns seguents aneriam ai laus Laramon ((2359 m) e aqueu de la Serp (2448m). Un molon de camins balisats son a descurbir. Vos aconselham d’utilizar la carta IGN 3535 OT.
Laus de la Serp
Per lu jorns de pluèia (e aquest an plouguèt) es possible d’anar visitar Briançon, la vila vielha e li sieu citadèlas e perqué pas li manjar.
Briançon
E vautres toi dont siatz anats en vacanças ? Es pas que sigui curiós, mas mi faria plasir de saupre.
Joan-Pèire BAQUIÉ
Nevacha lo 9 d’aost dau 2014