Amics occitans, la cronica Ribon-Ribanha d’ancuei, titrada “La rèina de la figuiera”, v’es prepauada da Joan Claudi Puech, amic Face Book de l’IEO-06.
Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
“La garderem ribon-ribanha, nòsta rebèla lenga d’Òc !”
Cortetas de Malanca
La rèina de la figuiera
Dins sa figuiera, Líli senhorejava lo monde sensa raras dei sὸmis de l’enfança. Aquí èra rèina. Tronava entre lei brancas mèstras de l’aubre dei sentors acras e amaras dei premiers jorns de mai. S’èra assostada a la lèsta dins son palais nὸu onte milas fenestras gitavan sus sa pèu sei rebats movedís, tot au cὸp blancs, verds e endaurats.
Èra moqueta Líli. A costat, tot bèu just espelidas, lei flors dei robiniers li fasián lingueta. Li agradava de lei mastegar. Ne’n trasiá la discreta sabor sucrada avans que de faire craïnar sota lei dents lei granetas deis ovaris, au mitan dei petalas vengudas flacas qu’emplissián la boca, se placavan a la lenga.
Mai aqueu jorn d’aquí aviá degut batre en retirada. Èra pas la multitud vonvonejanta dei babaus que l’entrepachava, que per aquὸ, teniá, ela, lo biais de pas se faire ponhar, mai i aviá agut aquela mena de cabrian que l’aviá cochada fin a la figuiera. S’èra arrestat au barri de la rama, mai tavanejava encara defὸra, virava, auriatz dich que l’esperava.
Coma anava qu’aquesta bestiona vouguèsse pas partejar lei flors? N’i aviá per totei!
Encanhada, se metèt a sonar entre ela la rampelada dei gardas dau palais. Levèt lo morre, un aucèu dei colors vivas, ajocat a la pus auta branca de la figuiera, l’agachava d’un uelh estonat, redond, escondut, semblava, darrier una masqueta dei plumas negras. Testejava. Son gavais jaune se tiblava, choquetava e son un ventre fernissiá dins dei rebats blavencs. Prenguèt la volada subran, desplegant seis alas dins un miralhejar de coire brun e roge.
Èra lo papagai coma disiá lo Grand, mentre que l’institutor, qu’eu legissiá lei diccionaris, li disiá de vespier, d’abelhὸla ὸ de serena. Aqueu darrier nom l’aviá facha chifrar l’an passat. Aprenguèt puei que lei serenas, d’en premier, èran dei fremas aucèlas, polidas, verai, mai mèfi! Avián lei dents coma d’agulhas!
Ansin, aviá tornat un pauc avans ora, l’aucèu vengut dau país dau Prince Joan, de l’autra man d’ailà de la mar ! Ailà, onte fai totjorn caud.
Lo cabrian bronzinava encara de l’autre costat dei fuelhas quand un chafaret estracèt subran l’espandida. Dei quielets envaïssián lei quatre cantons dau reiaume. Líli alonguèt lo cὸu. Dei desenas de papagais se ronçavan en dessús dei robiniers, agantant a la volada, ambé sei bècs que semblavan a l’espaseta dau Cat Bὸtat, totei menas de babaus, pichὸts ὸ grὸs, avans que de s’entornar lèu ambé sei predas en d’endrechs desconeguts. Quauquei segondas après pasmens èran tornamai aquí, tot d’alas ponchudas, agudas e afieladas coma lamas de cotèus. I aguèt mai d’una ataca, puei, coma se tot aquὸ s’èra pas jamai passat, s’ausiguèt plus que lo vonvon costumier dei brondas. Defὸra lo cabrian tavanejava plus. Líli laissèt son trὸne e se gandiguèt devèrs lei robiniers. Lei gardas avián fach un trabalh dei bὸns, èra ben la rèina de la figuiera !
Joan Claudi Puech
La reine du figuier
Dans son figuier, Lily gouvernait le monde sans limites des rêves de l’enfance. Ici elle était reine. Elle trônait entre les branches maîtresses de l’arbre aux senteurs âcres et amères des premiers jours de mai. Elle s’était réfugiée à la hâte dans son palais neuf où mille fenêtres jetaient sur sa peau leurs reflets mouvants, tout à la fois blancs, verts et dorés.
Elle était penaude Lily. A côté, tout juste écloses, les fleurs des robiniers lui faisaient envie. Elle aimait les mastiquer. Elle en tirait la discrète saveur sucrée avant de faire craqueter sous les dents les petites graines des ovaires, au milieu des pétales devenues flasques qui remplissaient la bouche, se collaient à la langue.
Mais ce jour là elle avait dû battre en retraite. Ce n’était pas la multitude bourdonnante des insectes qui la gênait, car elle avait l’habilité nécessaire pour de ne pas se faire piquer. Mais il y avait eu cette espèce de cabrian qui l’avait poursuivie jusqu’au figuier. Il s’était arrêté au rempart du feuillage, mais il tournait et bourdonnait encore dehors, on aurait dit qu’il l’attendait.
Comment se faisait-il que cette petite bête ne veuille pas partager les fleurs? Il y en avait pour tous! Enervée, elle se mit à sonner en elle le rappel des gardes du palais. Elle leva le nez, un oiseau aux couleurs vives, perché sur la plus haute branche du figuier, la regardait d’un oeil étonné, rond, caché, semblait-il, derrière un petit masque de plumes noires. Il dodelinait. Son jabot jaune se tendait, il hoquetait et son ventre frémissait dans des reflets bleutés. Il prit soudain son envol, déployant ses ailes dans un miroitement de cuivre brun et rouge.
C’était le perroquet comme disait son grand-père, tandis que le maître, qui lui lisait les dictionnaires, l’appelait le guêpier, l’abelhὸla, ou la sirène. Ce dernier nom l’avait faite réfléchir l’an passé. Elle apprit depuis que les sirènes étaient, tout d’abord, des femmes oiseaux, jolies, certes, mais attention! Elles avaient les dents comme des aiguilles !
Ainsi, il était arrivé un peu plus tôt, l’oiseau venu du pays du prince Jean, de l’autre côté, là-bas, de la mer ! Là-bas, où il fait toujours chaud.
Le cabrian bourdonnait encore quand un vacarme déchira soudain l’espace. Des cris perçants envahissaient les quatre coins du royaume. Lily allongea le cou. Des dizaines de perroquets se précipitaient sur les robiniers, attrapant à la volée, avec leur petits becs qui ressemblaient à la rapière du Chat Botté, toutes sortes d’insectes, petits ou gros, avant de vite repartir avec leurs proies en des endroits inconnus. Quelques secondes après pourtant ils étaient de nouveau là, tout en ailes pointues, aigues, affutées comme des lames de couteaux. Il y eut plus d’une attaque, puis, comme si tout cela ne s’était jamais passé, on n’entendit plus que le bourdonnement habituel des frondaisons. Dehors le cabrian s’était tu. Lily quitta son trône et se dirigea vers les robiniers. Les gardes avaient fait du bon travail, elle était bien la reine du figuier !