Amics occitans, la cronica Ribon-Ribanha d’ancuei, titrada ” Lu custòdes de la grava d’Eza. “, v’es prepauada da Rogier Gilli, Soci de l’IEO-06.
Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
“La garderem ribon-ribanha, nòsta rebèla lenga d’Òc !
Lu custòdes de la grava d’Eza
D’estiu, sus la grava, l’i son aquelu que aprofitan dau frescor de l’aiga, d’autres estramaçats sus de materàs que si fan secar e brostolir au soleu, pi l’i son d’artistas que passan temps d’una autra maniera.
Ne’n connoissi un, Sergi, niçard emigrat en Lyon vengut en vacanças, que la sieu passion, tra doi banhs, es d’amolonar, embé gaube, lu palets gròs coma pichins, per ne’n faire coma ditz : de Moalhs (Moaïs en francés). Segurament son pas maestós coma aquelu de l’ísola de Pascas, mas son pariers a aluchar la mar, li bèlas esquasi nudi e, cauva estranha, an la potença d’aluenhar li carnmarinas. Aí es ver, lo cresi !
Que paciença per recampar dei bèlhs còdols sus la grava, lu gròs lu si va quèrre sota l’aiga, ariscant de bèure un còup. Pi cau trovar lo ponch de quilibre per lu pauar un sus l’autre. Tornar començar quora l’edifici s’aboira. Cau pas aver li mans tremolanti mas totplen de testardisa per ben capitar. Mas lo resultat fa l’admiracion dau monde que passan, fòtos m’au telefonet per immortalisar aquesti òbras efemeri.
Caps-d’òbra d’un jorn que un marron manderà en lo non-èstre de dont son venguts ò que un tavan gilós desfondrà m’un poncha-pen.
Una capelada l’artista !
Rogier GILLI avost dau2020
Les gardiens de la plage d’Eze
L’été, sur la plage, il y a ceux qui profitent de la fraîcheur de l’eau, d’autres, répandus sur des matelas, qui grillent au soleil, puis il y a des artistes qui occupent leur temps d’une autre façon.
J’en connais un, Serge un niçois émigré à Lyon, dont la passion, entre deux bains, est d’empiler artistiquement des galets, gros et petits, pour bâtir ce qu’il nomme des : ‘’Moaïs’’. Bien sûr ils ne sont pas majestueux comme ceux de l’île de Pâques, mais eux aussi observent la mer, les belles dénudées et chose étrange ils ont le pouvoir d’éloigner les méduses. Eh oui, c’est vrai !
Quelle patience pour choisir de beaux galets sur la plage, les gros il va les chercher sous l’eau, au risque de boire la tasse, puis trouver le point d’équilibre pour les disposer l’un sur l’autre. Recommencer quand le bel édifice s’écroule, il ne faut pas avoir les mains tremblantes mais surtout beaucoup d’opiniâtreté pour réussir.
Mais le résultat est spectaculaire et fait l’admiration des passants qui immortalisent, dans leur téléphone, ces œuvres éphémères.
Chefs-d’œuvre d’un jour qu’une vague renverra dans le néant d’où ils sont issus ou qu’un imbécile jaloux détruira d’un coup de pied.
Chapeau l’artiste !