Terça jornada culturala en omenatge a la montanha occitana

L’IEO-06 participèt lo 5 de decembre a Coni (Itàlia) a la terça jornada culturala en omenatge a la montanha occitana.

L’apontament n’èra estat donat da la Chambra d’Òc per la jornada dau dissabta 5 de decembre a la sala de la « Província » de Coni da 16 oras a 23 oras. Es lo terço an consecutiu que ven organizat un eveniment per passar ensems una jornada en convivéncia.


La jornada comencèt per la presentacion de l’enquista e dau film realizats da Maurizio Dematteis e Davide Casali « Vivem un novèl país : migrants dins li tèrras autas ». La Chambra d’Òc a vorgut presentar 14 cas de personas e de comunitats en provenença da país luenchencs qu’an sauput s’integrar e que son estadi ben aculhidi. Lu ivorians de Draonier, lu moldaus de Garessio, lu tunisians de Robilant, lu albanés dau Bequet de Sampeyre, lu macédonians de Bueves son qualqui exemples d’aqueu trabalh e que vegueriam.

A 5 oras dau sera la jornada continuèt per una projeccion fotografica de Daniele Landra e un film d’Elisa Nicoli dedicats a la granda manifestacion per la lenga occitana que s’es passada a Carcassona lo 24 d’otobre « Anem! Òc! per la lenga occitana » a la quala partecipèron 25.000 personas.

A 6 oras Elisa Nicoli, ja autritz dau film « En viatge: chaminada en Occitània da Vinai a Vielha » presentèt en avant premiera lo film sus li valadas occitani, frucha dau travalh fach en ocasion de la traversada dau 2009 « Las Valadas Occitanas a pè ». Un moment qu’a permés en toi de veire en Elisa Nicoli, documentarista de Bolzano, una cineasta confirmada per lo sieu bèu travalh plen de sens.

A 7 oras e mieja un manja-drech emb’ai produchs de la Chambra d’Òc donèt l’ocasion ai personas d’escambiar opinons e d’estaire ensems en amistat.

A 9 oras dau sera lo grop « Aire de Prima », grop testimòni de l’apèl « Lenga d’òc Patrimòni Mondial de l’Umanitat » presentèt lo sieu novèl espectacle compausat d’un repertòri de cants a majoritat dei valadas e d’una seguida de cants franco-provençals.

Manuela Almonte presentèt finda lo sieu jornal de viatge que contava la sieu experiença dedins « L’occitània a pè ».

Terça jornada culturala en omenatge a la montanha occitana
Terça jornada culturala en omenatge a la montanha occitana

Podem apondre que mai de 200 personas èran presenti e que li autoritats de la Província (un pauc l’equivalent dau Consèu General en cò nòstre) e de la Region Pimont participèron en aquesta jornada. Lo president de l’IEO-06, après un pichin discors sus li accions comuni passadi (Rescòntre dei caminaires a Montsegur, caminadas d’Auriveta San Miquèu e de Coarasa…), balhèt au president de la Chambra d’òc, au nom de la Comuna de Coarasa e de l’IEO-06 un panèu de fusta embé l’inscripcion « Camin de la lenga d’òc ».

En la delegacion de l’IEO-06 l’i èran : Regina BAQUIE, Carlòta RUBINI, Joan-Pèire Aiperto, Joan-Pèire BAQUIE.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *