Vequí encara ancuei, una autra adaptacion au niçard d’una peceta que pensi èstre provençala e tracha d’un metòdo d’ensenhament alestit per de monde de Cucuron. N’ai denembrat lo nom e demandi excusa au monde que li a travalhat sobre. Quauqu’un auguèsse li referenças… (cresi que li èra lo mòt « vau » dins lo titre)
WHAT IS GOOD FOR PARÍS…CAU QUE SIGUE BÒN PER NIÇA !
Jaume : Ò Peto, es tieu lo fusiu ?
Peto : Ben, quora lo crompèri, lo paguèri pas ‘mé lu tieus sòus !
Jaume : Aquò lo sabi ! Auguèsson basta lu mieus sòus, farion pas fortuna, aquelu que lu fan !
Peto : Sabii qu’ères còntra lu caçaires, e vèi qu’as pancara fach la patz emb’elu ?
Jaume : Capissi pas lo plasir d’estripar de bèstias que t’an pas fach ren.
Peto : E alora de carn ne’n manges jamai ?
Jaume : De carn ne’n mangi, es pas per aquò que fau lo macelier.
Peto : A ! Mi fètz ben rire, lu ecologistas coma tu ! Li siguèsse pas plus de caçaires, seria la fin de la natura. Li a basta nautres que fèm quauqua ren per la parar.
Jaume : Aí ? E ben siam bei alora ! L’an passat eravatz cent vint per li còlas de Blausasc, a tirar quatre paures conius en li flòtas.
Peto : Bèu garri ! Aquest an avèm laissat anar doi cents fasans e tres cents perdigaus.
Jaume : Ò ! Lo sabi que planhètz pas lu fasans de gàbia ! Quora lu tiraviatz, me’n avisi avion encara lo totaliment dins lo gavai. Semblavan de galinas, venion ti manjar en la man.
Peto : Ò ! Ronha ! Alora cen que cau faire ? Ten, per la dubertura, diménegue, eravam dau caire de Duranùs…
Jaume : Èra diménegue la dubertura per lo departament.
Peto : Mas si fa per la França tota parier bèu pichon ! Denant èra decidit per cada departament, aüra es tot decidit per París.
Jaume : Cen qu’es bòn per París, cau que sigue bòn per Niça.
Peto : Ten, se fas ren esto sera,ven ti sopar a maion. Avèm espelhat una lèbre, e vau faire rostir lu tordos, que n’avèm amaçat l’autre sabta uech de fila, a la passada dau matin.
Jaume : A ! ‘m’aquò, faries renegar un Sant !
Peto : E mai d’un ecologista ! E ben, fai pas tant de manieras, un moment de vergonha es vito passat.