Resson dei imatges dau Blagaire de l’IEO-06 Jan-Jaume de Niça ven de nen mandar la sieu 49ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Pantais de pescaire
Au premier jorn dau mes d’abriu de 1861, ben après la dubertura de la pesca dins lei ribieras de premiera categoria, es aquí, dins lo Palhon dau Laguet alora vengut francés, que l’amic Rau de la Rada de Vilafranca agantèt una giganta trocha saumonada (1).
Anatz pas de creire, coma se vei sus aquesta fotò Nonors de Bona-nuech-lei-pichins, que seriá qu’una istòria per durmir de drech. Non e non, lo miracle fuguèt de verai complit ! Son de marrits mescresents qu’an trafegat la fotò (2). L’ex-vòto d’aqueu temps, l’originau, se pòu totjorn remirar, cada premier d’abriu, encrocat a la parèt de la capèla sorna dau sanctuari de Nòstra Dama dau luec, après aguer escambiat lo mòt de Santa Clara ( Micolau – Pimpinèla ) emé la maire mongeta que, tirant la cadaula, vos durbirà la pòrta !
Mai, dins nòstrei temps de secaressa ruda faudriá fòrça trafegar la fotò … per veire d’aiga dins lo laus pichin …
1. s’èra sota d’un carobier, R. de Vilafranca (3), auriá pas poscut afiermar, meme sensa se trompar de pòrta, qu’èra tot solet, emé lei sieunas bràias ben remontadas, per pescar dins lei rius frejauds, a bostiguejar … lei peis …
2. èran de fins renaires aquelei trefegaires : t’an escondut Ulisses (4), lo pichin flaütet e la saqueta de sabla beluguejant
3. coma après 1789, mai que d’un « caga-a-l’abric » (5) a particula son estats ben acorchits, venètz pas me cercar garolhas se l’ai facha corta, oblidant dau Rau, lei sieunas particulas per camin …
4. Ulisses que parli aquí, es aquí lo vertadier, lo menaire de nive au calabrun, qu’a ren de veire emé aqueu que fasiá creire a sa mitat, una teisseira de mestier dau temps que Berta fielava, qu’anava de lònga, pescar de potarga de serena dins la mar de Berra ; te disi pas l’istòria, qu’ò maire, ne’n faguèron …
5. Pèire Pascau dins sa cançon « adieu l’amic »
JJ de Niça