Article 3000

Cara amiga, car amic, car sòcis,

Despí novembre 2004, l’IEO-06 presenta lu sieus articles sus lo malhum. Ancuei ne’n siam arribat a l’article 3000 e donam la paraula ai sòcis de l’IEO-06 que dion lo sieu sentiment sus la sieu associacion : Institut d’Estudis Occitans, reconoissut d’Utilitat Publica en lo 1949 e associacion d’Educacion Populària en lo 1986..

11 personas an ja escrich asperam d’autri testimonianças.

Bònjorn en toi ! Mi dion Mònica. Empari lo niçard embé Marc a Còntes lo dimècres. M’agrada fòrça aquesta lenga que mi remembra ma maire e mon paire. Participi tanben au cors de coïna niçarda embé Crestian. Bessai en setembre seguerai lo cors de teatre a Drap.

Es un vertadier plasir, cada setmana, d’emparar la nòstra bèla lenga au CAL Bòn-Viatge (Animanice), embé lo magistre JP Baquié. Despí mai d’un an, pilhi de cors de niçard e siáu tornat un escolan. Pilhi, finda de cors a Saorg, empari a sonar li campanas embé un autre bòn magistre JP Aiperto, lo mieu amic Rubata-Bauci . Ai animat aquest annada, un atalier de coïna niçarda, embé totplen de sòcis amics e participi finda a l’atalier de teatre. Crestian

Bònjorn en toi ! Mi dion Max. Empari lo niçard embé Marc a Còntes lo dimècres, perqué, coma l’a dich Ben : Cu perde la lenga perde son país.

Quora ientrèri a l’Institut d’Estudis Occitans, mai de 30 ans en arrier, eravam 5 ò 6 alentorn d’una taula lo jorn de l’Acampada Generala. Èra la soleta activitat de l’IEO-06. Que de cambiaments despí : 7 cors de lenga, 3 ataliers de danças tradicionali, un de cant, un de teatre, l’atalier dei campaniers de Saorg, li caminadas, lo camin de la lenga d’òc, lu partenariats embé la MJC Agora Nice-Est, lo P.N.R Préalpes d’Azur, lo site que festejam ancuei l’article 3 000, la pàgina Facebook, li animacions en li escòlas, lu licèus, embé Solidarsport. Participam au festenau dau libre de Moans-Sartòu, siam editor, formam au DCL-Occitan (Diplòma de Competença en Lenga) e.c.a… Ancuei l’IEO-06 es membre de la comission rectorala Lenga e Cultura Regionali e es una mena de reconoissença tanben. Siáu fier d’èstre sòci d’aquesta associacion pan-occitana. Una capelada ai ancians presidents Jòrgi GIBELIN, Andrieu SAISSI, Gilibèrt COMBE, Jaume PIETRI e tanben au novèu Joan-Pèire SPIES. Lònga vida a l’IEO-06 ! JPB

Vòli, aquí, aremerciar l’IEO 06 perque despí que n’en siáu sòci, dau Niçard dei carrieras que parlavi despi l’enfança siáu passat a una lenga mai completa, e, sobretot a una lenga que pòdi legir e escriure en grafia clàssica ( en faguent encara de bèli fautas, mas travalhi ).
Tot aquò gràcia a Monsur SPIES, que foguèt magistre lo dijòus a Drap, que saupèt mi convíncer de mi mandar en l’aiga per faire l’animator dau cors en la sieu plaça (fortunat qu’èri, l’i èra d’àiga en Palhon).

M’a permès de faire de progrès e sobretot de capitar pas tròup mau per lo DCL d’Occitan, solet e unico diploma universitari que mi tròvi d’aver a esquasi setant’ans.

A si veire benlèu, baietas en toi. Rogier GILLI

L’IEO-06 dona a despartir la lenga nòstra !
L’IEO-06 dona a despartir la curtura nòstra !

Lo mai luenh que menavi lo niçard, siguèt en Novela Caledonia (païs dont si parlan 27 lengas diferenti, sus 27 territòris linguïstics, au contrari de nautres que parlam sus lo territòtòri linguïstic occitan una lenga soleta, rica de totplen de parlars) dont augueriam fortuna de jugar au pilo sus l’arena de l’isoleta Signal, au bèu dau lagon, patrimòni mondial de l’umanitat, coma lo serà reconoissut un jorn la lenga nòstra !

Anerem de l’avant dins la draia de la tolerança, dau respect e dai escambis curturaus embé lo monde tot !
Viva !
Joan-Pèire Spies

Mieus ieò

«Occitan sens lo saber»*…en roergàs

IEO 12 : Ostal dels joInes de Milhau – Descobèrta…en lengadocIan
IEO 34 : Estudis universitaris a Montpelhièr…en lengadocian
IEO 09 : «Montsegur, te dreiças pertot» !!!! **
IEO 31 : Universitat del Miralh a Tolosa – encara a estudiar…en gascon
CAOC : Amistats a Barcelona ….en occitan e catalan
IEO 12 : Escòla Normala de Rodés…danças e cants…en lengadOcian
IEO 63 : Plaça de Jauda, Joan BOdon…en auvernhàs
IEO 65 : Dins mon lièch….en bearnés
Val d’Aran en 404…en aranés
IEO ISOLATS : Cooperacion en AfrIca…en provençau ; puèi l’Asia…en lemosin
IEO 04 : Rescòntres occitans de Provença …en gavòt
IEO 13 : Dins son lièch…en provençau
IEO 75 : A Paris per lo trabalh….en tots los dialèctes occitans
Guardia Piemontese…en occitan d’Itàlia
IEO 47 : Escòla occitana….en lengadocian, lemosin o gascon
IEO 06 : Retorn al Pais…Palhon e Niça…en niçard
IEO 12 : Estiu e Estivada… Patrimòni…en lengadocian
IEO 06 o 34 e 12 : Lo temps de la retirada….vendrà lèu….de segur en occitan!

Alara l’IEO per ieu ? Un brave tròç de vida…
Un polIt biais per sE passejar, en Occitania o endacòm mai
Tra los dialectes, se comprene e se parlar
«Es la votz d’un pòble sus li camins de l’espèr…»***
Amb fòrça Plaser
Amb la Lenga :
E sustot d’Encontres a bodre
Amb d’Amics
Òsca !
Amistats a tots

* Claude Marti (Los Carbonièrs de La Sala)
** Claude Marti (Montsegur)
*** Alan Pelhon (Escotatz)

Joan-Marc RABIER

Mi plas de balar li danças tradicionali e siáu a l’IEO,
mi plas de charrar en niçard e siáu a l’IEO,
mi plas de cantar des cançons d’aquí ò d’aià e siáu a l’IEO,
mi plas de caminar sus lu camins de mon país e siáu a l’IEO,
mi plas de coïnar emé d’amics e siáu a l’IEO.
De mai empari totplen de cauas, rescòntri totplen de monde, e tot aquò despi 8 annadas….. ò mai bessai (sabi plus) . Siáu pas lèsta d’arrestar !!!

Valérie ROSSO

Quora èri pichona la mieu maigrana e li mieu tantas mi parlavan niçard. Mi plasia escotar mon paire charrar ‘mé la sieu maire en vièlha vila. Ai totjorn audit e capit lo niçard sensa lo parlar. L’annada de la mieu retirada mi siáu dich : es temps ! Cau anar emparar lo niçard; ai abutat la pòrta de l’IEO 06 mé Choaseta e li siáu totjorn. Travalhi pas de tròup, parli pas ben, ma siáu contenta de mi retrovar au cors lo dimarç. Despí 2 ans ai estirassat lo mieu espós Roger : es un Francés d’Antíbol que capissia ren. Ancuei a fach de progrès.

Marie-Do e Roger

Per lu amics e li amigas, siáu Quiquí e fa d’annadas que siáu sòcia de l’IEO. Per emparar lo niçard segur, faire totplen d’activitats : teatre, coïna, caminadas….E a l’IEO siáu ben : tròvi d’amistat, de convivialitat e de foras de rire. Provar l’IEO es l’adoptar !!!!

Quiquí

Ieu, siáu mèstre Joèu, segui despi 3 ans lu cors de Sant Ròc. Qué regal ! Veni per charrar un pauc mai en lenga, perqué mi plas totplen. L’i a de gents que son d’amics. Es pròpi agradiu de charrar e de travalhar la lenga toi ensems. Esperi venir encara longtemps en aquestu cors.