Bòna Annada 2013 !

Cars amics e sòcis,

V’auguram una pròpi bòna annada 2013, ben granada e ben acompanhada.

Vos esperam encara mai numerós en lo 2013 a legir lu nòstres articles e a participar ai activitats de l’IEO-06 e aqueli dei associacions afrairadi (qu’arepresentan mai de 2 000 sòcis).

2012 siguèt una annada d’espandiment de la nòstra seccion embé 8 cors de lenga, 1 cors de mai (a Niça Sant Ròc bailejat da Françon DALBERA) rapòrt a l’an passat, 2 ataliers de danças tradicionali, un de teatre, de charaïssa, de cant tradicionau, de música, la cronica setmaniera “ribon-ribanha”, la biblioteca-cedeteca a Niça, eca… Avèm participat au passa-carriera de Tolosa lo 31 de març e aculhit l’A.G. de l’IEO-Federal a Niça au CLAJ d’en Cimier per doi jorns de travalh e de fèsta (Atalier teatre e Mago d’en Castèu), publicat lo nòstre libre Ribon-Ribanha, mes en rega, per part, sus YouTube, lu tèxtes de Ribon-Ribanha…

L’an 2013 serà una annada de consolidacion.

Avèm besonh de toi e v’aperam a l’AG dau 19 de genoièr a 9 oras 45, sala municipala de La Palhera a la Còla de Lop per ne’n discutre.

L’AG es un moment-clau en la vida d’una associacion, e si devem de toi l’i èstre.

Un autre apontament/rendètz-vos es previst lo 26/01 a 2 oras 30 embé la dictada occitana au C.A.L Bòn-Viatge. Aquest an es un dei 35 autors dau nòstre libre RIBON-RIBANHA que liegerà un tròç d’una sieu crònica, vos en reservam la suspresa.

Comptam sus la vòstra participacion e lo vòstre investiment. Vos demandam tanben de pensar a faire societar d’amics que pensan que desfendre la lenga d’òc e la sieu cultura es aparar la diversitat en lo monde.