Amiga, amic,
En aquesta fin d’annada, vos volii aremerciar d’aver fach encara un còup un tròç de camin embé nautres. Es vengut tanben lo temps de vos augurar de bòni fèstas de Calènas e una bòna annada 2012.
D’aqui gaire, lo 21 de genoier, si retroverem per l’AG de l’IEO-06. Lo 28 dau meme mes si debanerà la dictada occitana a Bòn-Viatge embé Pascal Coletta que nos farà l’amistat de la sieu presença. Venètz numerós qu’es en ren una dictada a la Pivòt, mas una fèsta de la lenga. Lo 31 de març serem toi a Tolosa per dire lo nòstre projèct per la lenga occitana (pensatz de vos marcar pròche lo nòstre clavaire Maurici Casciani : http://ieo06.free.fr/spip.php?article2164& ). Avèm de pan sus lo canissa e avèm da besonh de la vòstra ajuda. Siam passats de 5 a 7 cors de lenga aquest an, gaug a la volontat de sòcis coma Marc Waltzer e Joan-Pèire Aiperto, a l’ajuda de comunas novèli que nos an dubèrt li sieu pòrtas.
Avèm l’esper de ne’n durbir un de mai au principi de genoier a Niça embé l’ajuda de Françon, Carlòta e dau vòstre servitor. Li cauas bolegan perque siam units, formam una grana familha. Toi, tant que l’i siam podem faire quauqua ren per la lenga e la curtura nòstri. Vos demandi de l’i pensar e de nos faire de propòstas a l’AG de Pelhon (Sala de la SOSTA).
En asperant de vos veire, vos desiri encara un còup de Bòni Calènas, una bòna fin d’annada 2011 e sobretot una annada 2012 tota clafida de projectes personals e dins lo quadre de la vòstra associacion IEO.
Ben amistosament
Per l’IEO-06
Joan-Pèire BAQUIE
