Diménegue 29 de novembre eravam un vintenau de sòcis, cu per la caminada de Ròca-Sparviera embé Joan-Maria ROSSET, cu per la vísita de la capèla Sant sebastian embé Miquèu BORSOTTO, cu per la vísita comentada de Coarasa embé Alain RIBIERE.
Partits a 7 oras e mieja de Còntes (Teatre de l’Eliça) li veituras si son endraiadi devèrs l’Engarvin. Lo temps èra de la partida, lu sòcis lèsts a caminar sus li peadas de la Regina Joana.
Li roinas de Ròca-Sparviera
Lu caminaires
Arribats sus plaça a Ròca-Sparviera lo luec fabulós, màgico e emplit d’Istòria, conquistèt lu caminaires qu’eravam. Dins la capèla Sant Miquèu Joan-Maria contèt la legenda de la regina Joana e Joan-Pèire cantèt lo « Dio vi salvi regina ». Era pi lo moment de s’en tornar a l’Engarvin e si faire una pichina merenda ben ameritada.
Capèla Sant Miquèu de Ròca Sparviera
A doi oras dau ‘près-dinnar Miquèu n’asperava sus la plaça Santa Catarina (Place Alexandre MARI) per anar fins a la capèla Sant Sebastian dont nen faguèt descurbir embé gaubi una grana partida dei misteris e signes isoterics pintats a fresc sus li parets e lo votin de la capèla. Sigueriam encantats dai sieus dichs.
Capèla Sant Sébastian de Coarasa (detalh)
A cinc oras Alain, n’asperava per la vísita dau vilatge partent dau vièlh camin de Niça, luec dont arribavan lu estatjants e lu visitors de Coarasa denant l’arribada dau camin enquitranat que conoissem ancuei. Se la comuna prepaua despí gaire d’audio-guidas en cinc lengas (occitan comprés) ren porrà remplaçar la persona umana atentiua au questionament de cada persona.
Pontís
La vísita dau vilatge s’acabèt per lo gòto de l’amistat en presença de dòna Mònica GIRAUT-LAZZARI, cònsola de la comuna qu’obtenguèt lo premier labèl « Òc per l’occitan » de tot l’espaci occitan.
Emb’ai fèstas de Calènas e de Cap d’An, li caminadas si van arrestar au mes de decembre per repilhar a la mitan de genier dau 2016.
Vos tendrem au fiu.
Joan-Pèire lo 30 de novembre dau 2015
Crédit Photos : Alexandra DESMOULIN, Roger LEFRANC, Joan-Pèire BAQUIE