-* Diménegue 25 de setembre dau 2016 eravam 24 a aver respondut a la chamada de L’IEO-06 e de Joan-Maria ROSSET. Lo temps èra bèu e sigueriam aculhits sus plaça per lù nòstres sòcis Jan-Pièr AIPERTO e Crestian DERUMEAUX estatjants Saorgins.
Lo luec d’apontament
Saorge es un pròpi bèu vilatge, bastit en aut de la Val Ròia sus d’un racàs. Li sieu maions si tenon l’una embé l’autra. Quora intratz au plan terren d’un costat d’una maion vos podètz trovar au terço plan de l’autre costat tant la penda es importanta. Si passa en de carreiròus estrechs dont son fòra bandidi li veituras.
Vista de Saorge despí lo monasteri
Si siam pi endraiats toi ensems fins au monasteri que presenta una bèla vista sus lo vilatge e li montanhas alerntorn denant de s’en puar dins lo valon d’Anguiron fins a la Pinea.
La Pinea
D’aquí siam calats fins a la capèla Santa Crotz dont n’asperava François autre estatjant de Saorge. Avèm sortit dau sac lo past e manjat ensems. Jan-Pièr AIPERTO nen faguèt present de la sieu cançon « Rubata-Bauci » e canteriam ensems denant d’un pichin penec ben au soleu.
Lo temps dei cançons
Dins l’après-dinnar, visiteriam per d’unu lo vilatge, lo monasteri per d’autres pi sigueriam convidats a veire e a escotar lo terinhon itinerant de l’IEO-06 manejat da Jan-Pièr. D’unu sòcis provèron tanben de campanejar.
Jan-Pièr AIPERTO davant lo terinhon de l’IEO-06
Passerai pas sota silenci l’acuelh au negòci de Crestian DESRUMEAUX que nen faguèt tastar li sieu confituras a la venda e tastar la torta saorgina.
Siguèt una pròpi bèla jornada rica d’escambis dins la convivialitat e l’amistat. Un grand mercí ai organizators e ai participants.
P.S : Pensatz de nos prepauar de contacts embé de monde que nen porrian faire descurbir lo sieu vilatge.
Credit fòtos Régina BAQUIE