Lo 06 d’abriu eravam 26 per descurbir draias, carrieras e tresòrs de Còntes
L’IEO 06 organisa (en mai dei cors d’Occitan a Còntes, Drap Saorge, Nice, Grasse, La Còla…) de maniera regulara de caminadas descuberta dont si va au rescòntre dei gents e dei tresòrs esconduts de la region nostrala. Aquesta setmana avèm vorgut faire descurbir Còntes.
Apontament a nòu oras davant lo teatre de l’eliça per un premier coup d’uelh ai novèli installacions, 
pi direccion lo site de la Lausa per una vísita comentada (e totplen apreciada) dau defici e dau martinet per Monsur Lemaire e Monsur Paccioti.
Onze oras e mieja, es lo moment de faire escaufar li cauçuras. Traversam lo vielh vilatge per la carriera dau Frau,
lo vièlh ostau comunau, lo lavatòri, plaça de la República,
carriera Sant Martin,la Pinhatiera 
per si rendre au Riodam,
sensa aver denembrat de saludar la fònt de la Maire qu’avia ben cambiat la vida dei Contés gaire de temps fa,
dont n’asperava Monsur E. Martin, que nos avia gentament convidats a venir manjar a l’escontisson au sieu. 
Es alora tota l’istòria de Còntes que pilha l’abriva: li socas, lo mimòsa, la cabana dei Barbets, la vida dau temps de la guèrra e quauqu pichins racòntes pron comovents per totplen, sus d’amics encara fòrça presents, tot aquò de segur en lenga nòstra,
es inespuisable Monsur Martin!
E nautres per l’aremerciar, avèm cantat quauqui cançons ‘mé l’ajuda de la jorgina.
Aqueu grand moment de convivialitat acabat avèm torna pilhat lo camin dau retorn, emb’un pichin peçugament au còrs.
Retorn sus la plaça, una fotò davant la fònt de segur, 
e sigueriam aculhits per fòrça soghinhes au manhific musèu dei tradicions per una vísita comentada da Monsur Gasiglia A.
Serà pi lo moment de la separacion ‘mé quauqui cançons e la satisfaccion dei organizators d’aver fach apreciar en toi, lu tresòrs de mens en mens esconduts d’aquela bèla pichina vila.
Marc Waltzer
Per la traduccion : http://ville-contes.net/une-balade-aux-accents-nicois/
(Fotòs: Michèle et Roger Lefranc, Annick et Marc Waltzer)