Dimars 9 de decembre, si siam retrovats dins la sala de cors cómola dau Gramon per la conferença de SANO Naoko.
Convidada per l’IEO-06 e l’Agora Nice-Est, Sano Naoko, professora de la Facultat dei Scienças Umani e Sociali, Universitat de Nagoya au Japon faguèt la sieu comunicacion : « «Cal far la fèsta» ?- l’identitat occitana e la cultura regionala ».
Partent d’exèmples de fèstas coma « L’estivada de Rodés » ò la « Fèsta d’òc » de Besièrs, aquest apontament/rendètz-vos musical dont li músicas de l’occitania son mescladi en aqueli de toi lu suds, SANO Naoko interroguèt organizators e elegits sus lo sens de la fèsta occitana.
Mai que lo fach, ja extraordinari, que la conferenciera japonesa utilisèt l’occitan coma lenga de comunicacion, es lo regard portat d’una persona exteriora au « fach occitan » que retenguèt l’atencion dau monde.
La conferença èra publica e si son retrovats de sòcis de l’IEO-06 de segur mas tanben d’autri associacions coma lo CCOc-País Niçard, Sota Òrme, Bolega-Bolega,… ò simplament de gents interessats per lo subjèct.
Conferença de Sano Naoko
Conferença de Sano Naoko (2)
Numerós son estats lo monde a pauar de questions e escambiar dins la sala. Lo sentiment general siguèt que lo niçard, tant coma lenga que coma cultura, que se de segur a una identitat fòrta, a ges d’avenir a si tenir a despart de l’ensems occitan.
Da signalar que la conferença es estada registrada tra autre per Radio « Nissa Pantai » e que si porrà escotar d’aquí gaire sus lo malhum.
Da signalar tanben que lo còro dau Gramon, la contairitz Annie Laligant, Fanny Genti dau Groupe Occitaniss’ e ben d’autres encara participèron a l’animacion pòst-conferença que s’acabèt per lo gòto de l’amistat.
L’IEO-06 aremercia encara SANO Naoko per la sieu venguda e toi aquelu qu’an contribüit de faire d’aquesta venguda una capitada.