Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups. Per informacion, aquesta cronica comencèt, l’i a mai de vint e un ans, lo 18 de junh de 1997. Òsca !
Cronica, dau 30 de septembre dau 2018 en lenga nòsta per l’Agachaire
Sant Jiròni
Après dètz-e-sèt setmanas d’un laïcisme integrau e republican, vaquí que l’Agachaire tòrna au calendier gregorian, que festeja encuei sant Jiròni. Nòsta « Legenda daurada » lo sonava sant Jeronime. Moriguet un 30 de setembre de l’an 420, qu’aviá probable 73 ans, e es estat nomat puei un des quatre Doctors de la Glèisa.
De ses òbras, emai de sa vida, l’òm podriá remplir de bibliotècas, e rapòrt a ses escrichs l’an chausit coma sant patron dei bibliotecaris, emai des traductors. D’aquí que l’òm celebra pereu encuei la Jornada internacionala de la Traduccion. Que revirar la Bíblia, en se tenent au pus pròchi des originaus grècs e ebreus, es estat un de sei grands pretzfachs.
Dins son temps de jovent, estudiava la filosofia, que la teologia l’atrobava gaire agradiva. Mai un pantais cambiet son vejaire, e desenant luchet còntra les erètges. Aqueles, per se revenjar, mentre que durmiá pausèron au pè de son liech de vièstits de frema. E eu, lo matin, lei metet sensa s’avisar de ren… O ditz ansin la « Legenda » :
« Et el quand se levet a matinas, a las quals el se levava quada ser, vestic la rauba de la femna, que cujet aver vestida la sua, e venc se’n al cor, que non se’n prendia guarda, e l’esquern se dreissa contra lhuy coma aquel que ten femna en sa cambra ; el adoncas fugic se’n de vergonha a Constantinoble. »
Jean Yves ROYER