Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e quatre ans, lo 8 de junh de 1997. Òsca !
Cronica, dau 06 de junh de 2021 en lenga nòsta per l’Agachaire
E ara onte ne’n siam ?
A la fin de la setmana passada, vegueriam en pron d’endrechs d’importantas manifestacions par la defensa e l’aparament dei lengas regionalas, après les eveniments legislatius que sabem. L’i aguet pereu de presas de posicions en sa favor, tant dins la premsa coma en cò d’òmes politics importants.
Citarai aquela de Bayrou, diguent que la decision dau Consèu constitucionau resultava d’una « faussa interpretacion » de la lèi, d’abòrd qu’aquesta (èra d’aqueles que la votèron) èra estada facha per empachar lo francés de se faire manjar per l’anglés, e pas per s’opausar ai lengas regionalas. D’alhors, tot lo monde pòt remarcar que les anglicismes de tota mena an continuat de crèisser dins la societat, coma l’ensenhament en anglés dins d’escòlas francesas. E quand, en 2015, una lèi sus l’ensenhament superior e la recèrca donet a l’ensems des establiments d’ensenhament superiors francés, universitats compresas, lo drech de prepausar de formacions en anglés, vegueriam degun a la cima de l’Estat bramar qu’aquò fuguèsse contrari a la lèi de la Republica… Autrament dich, se desenant ensenhar en breton ò en occitan es illegau, demòra legau d’ensenhar en anglés !
Bayrou apondet que la sola solucion èra de modificar la constitucion, e de l’i marcar que « la França e l’Estat an lo dever de sostenir lei lengas regionalas ».
Jean Yves ROYER