Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e quatre ans, lo 8 de junh de 1997. Òsca !
Cronica, dau 19 de junh de 2022 en lenga nòsta per l’Agachaire
La Fèsta des Paires
M’èro jamai demandat ni l’origina ni sa data de la Fèsta des Paires, e en la cerquent per escriure esta cronica, siáu estat un pauc estonat de la resulta.
N’i a que dison qu’ei fòrça vièlha e d’origina religiosa, e que remontariá a la celebracion medievala de sant Josèp. M’estonariá pron : aquela fèsta anciana, lo 19 de març, celebrava sant Josèp l’espós de Maria, e lo paire adoptiu de Jèsus, mai degun auriá imaginat de ne’n faire un simbèu d’una paternitat qu’èra pas vertadierament la sieuna, e encar mens de la paternitat en generau, per crestiana que fuguèsse.
La promiera Fèsta des paires laïca fuguet imaginada ais Estats Units per una frema, celebrada lo 19 de junh de 1910, un pauc oblidada puei, reviudada après, avans de venir oficiala e fixada au tresen dimenge de junh. Sensa per aquò passar en Euròpa. Mai coma vai alora qu’es pereu una fèsta francesa ?
Ei just una idèia comerciala d’un fabricant de briquets, de l’entrepresa Flaminaire, que penset en 1952 qu’èra lo cadèu ideau a ofrir a un paire, d’abòrd qu’a l’epòca n’i a pas gaire que tubèsson pas… E cu ditz cadèu ditz pereu fèsta per n’èstre l’ocasion, e vaquí naissuda nòsta Fèsta des paires d’encuei. Emai fuguèsson de mens en mens fumaires, mancon pas les causas per acontentar un òme, e donar d’idèias a sei dròlles d’o faire au mens un còp per an !
Jean Yves ROYER