Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, aquesta cronica comencèt, li a mai de quatòrze ans, lo 8 de junh de 1997. Òsca !
Chronique pour ce samedi 15 octobre 2011 en lenga nòsta.
Lo Navèu
Per l’Agachaire
Es un ben paure lieume que nos prepausa encuei d’onorar lo calendier republican, ambé son navèu dau Tridí 23 de Vendemiaire… Faliá que nòstes avis revolucionaris aguèsson lo socit pron fòrt de l’Egalitat, per pas laissar de caire aquela paura causa blancassa, ò just un pauc rosada ; e encar, jamai d’en plen, coma se trantalhava per se trobar una color…
D’alhors, dire de « navèu » a quauqu’un a ren d’un compliment : tant vau li metre de « tòti », de « niais », ò de « santibèli »…
Pasmens dién qu’autre temps, que lei vendián en crident « Lei navèus fins !… » ne’n favon de sopa, de fricòt ò de purèia. Urosament qu’en cò mieu, aqueles preparacions passèron jamai lo lindau de l’ostau…
E quand l’òm parla de « rasclar lo navèu », es que l’i a pas de manjar de rèsta, que vau quasiment autant dinnar de parpèlas d’agaças, de regardèlas, de sopa de retombet (que ma grand me n’explicava la recèpta : « dos uous sensa lei rompre… »), ò d’esquichar l’anchòia.
E d’abòrd qu’ai citat ma grand, l’ai jamai vista cosinar de navèus, autrament qu’en ne’n metent dos ò tres dins lo bolhit. Tant ne’n passava pereu un parèu dins sei sopas de lieumes, mai coma sempre lei molinava, au mens se sentiá pas…