Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups. Per informacion, aquesta cronica comencèt, l’i a mai de vint e sèt ans, lo 8 de junh de 1997. Òsca ! Cronica dau 02 de febrier de 2025 en lenga nòsta per l’Agachaire

Istòria de ma Crècha (8)
E vaquí que siam a la Candelosa, lo jorn ont aicí l’òm desfai sa
crècha, e ei ben ce que vau faire totara. Serà pereu lo darrier còp
que vos aurai contat l’istòria de la mieuna. Mai en la tornent legir,
m’aviso que vos aviáu dich que lo Pichòt Jèsus, l’aviam crompat a
la fiera ai santons de Marselha. Mai coma èra de ciera, se faguet
pas tant vièlh coma sei gents de fusta. E venguet un jorn que fuguet
plus possible de lo tornar pegar. Adonc ne’n faguèro un, mai voliáu
que siegue pereu de ciera. E la sola qu’aviam dins l’ostau, èra un
paquet de candèlas, per quand l’electricitat mancava. Adonc me
talhèro un Pichòt Jèsus dins una bogia, emmalhotat coma autre
temps, e amb un pauc de goacha, èra tant Pichòt Jèsus coma totei
les autrei.
Lòngtemps, lo plaçavo just sus un liech de palha (de bauca, un
pauc chaplada ambé de cisèus). Jusqu’au jorn que li fèro un breç
amb una boita de broquetas. Mai per pas que se veguèsse de tròp,
cerquèro sus lo Net d’imatges de pòsts de la bòna talha, les
estampèro, les talhèron coma faliá e, un còp pegats tot a l’entorn, te
fava (e te fai encara) un breç un pauc rustic de tot segur, mai que,
tant, auriá tanben poscut servir de grúpia per l’i faire manjar un ase
ò un buou. E desenant, plus besonh de l’i tornar faire cada còp son
liech de palha : l’i èra dessús tot lo lòng de l’an…
Jean Yves ROYER

T’arremercii per aquesti crònicas setmanieri sus lo presepi/la crecha. Metèri lo mieu/la mieua lo 1ier de febrier en de cartons fins au mes de decembre 2025.