Resson dei imatges dau Blagaire de l’IEO-06 Jan-Jaume de Niça ven de nen mandar la sieu 24ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Quand Margòt …
» … quand monti, monti, monti au tieu, ai lo còr que bate, que bate … » sospirava Enric
» … e lo desideri s’acreisse quand l’efèct se recula … » escribèt Pèire
» … desabilhatz-me, desabilhatz-me, mai pas tròp lèu, pas subran … » nos convidèt Julieta
Canta que cantarà …
Aquí ges de plaça au pantais de l’amic Jan, ren que lo regard clar e freg dau comptable.
Per descordelar, plan plan, un a cha un, totei lei ribans ( a cent sòus lo bòn pam encò dau « Degalhaire » tancat a l’arrèst dei carris de Sostène ) dau corset de la bèla, faudriá ben mièlhs prendre rendètz-vos quora lo mes de febrier comptarà 29 jorns ( un biais de mai per nos faire ben languir ) e meme, quora totei lei quilomètres d’aquestei liames se trobaràn desseparats, après qu’aquesta escalinada per montar au sieu fuguèt plan plan, enfin complida, serem pas de segur de l’estat vertadier de la desirada, tè !
JJ de Niça