Es embé tristum que venem d’emparar la marrida nòva : Joan-Pèire GIRAUD es pas plus.
Naissèt en lo 1928 a Sant Estève dei Òrgas en lo forcauqueirenc, ven de defuntar ancuei 19 d’octòbre dau 2014 en la comuna de Levens.
Joan-Pèire GIRAUD militèt la sieu vida tota en favor de l’occitan. Era un òme apassionat per la lenga e l’istòria locala.
Faguèri la sieu conoissença dau temps qu’èra president de la Cambra de Mestiers de Niça en li annadas 1970. En aquesta època èra tanben clavaire dau CCOc-Pais Nissart e membre dau PNO. Siguèt pi elegit Conselher Regional sota d’una etiqueta regionalista occitana. Creèt una maion de País a Niça, e siguèt a l’iniciativa de la Calandreta de Drap.
Mai d’un còup faguèt viatge embé l’IEO-06 per aparar la lenga occitana coma a Carcasona, Besièrs ò mai en arrier, a Rocavion (Roccavione) en lo 1999 per la reconoissença de l’occitan en Itàlia (lei 482).
S’èra retirat aquesti darnieri annadas a Levens dont vivia embé la sieu frema Loïsa. Lo darnier còup que lo vegueriam, siguèt a una fèsta de l’IEO-06 dont nos venguèt trasmetre, coma ben preciós, una bandiera occitana que tenia dau Val d’Aran.
L’IEO-06 presenta a la sieu frema Loïsa, a la sieu familha e ai sieus amics li sieu complanchas. Una ceremonia en la sieu memòria si debanerà lo diluns 27/10 au fenerarium de la comba de Var (nacionala 202).
Per mai d’informacions vos demandam de vos revirar devèrs lo quotidian Nice-Matin.
Adieu Joan-Pèire, adieu l’amic,
