Cara amiga, car amic,
Coma l’an passat, l’IEO-06 e lo sieu Cèucle local lo Gramon organizeràn la dictada occitana a Niça, lu sòcis dau cors de lenga de l’IEO-06 a Drap l’i son tanben convidats.
Lu sòcis de Grassa e la Còla auràn la possibilitat coma l’an passat d’anar a Canas faire la dictada embé l’associacion amiga de l’Escomessa.
La dictada occitana serà organizada dins un quarantenau de vilas lo meme jorn (veire aficha) per faire d’aquesta dictada una fèsta. La tòca es pas de faire una dictada a la Pivot mas de si retrovar toi ensems a l’entorn d’un tèxto, d’un autor occitan per festejar la lenga nòstra. La dictada si porrà escriure en l’una dei doi grafias utilizadi en cò nòstre : la clàssica e la mistralenca.
Li tres premieri annadas, Loïsa SGARAVIZZI-NAVELLO professor de lenga, Miquèu PALLANCA, professor d’occitan-Lenga d’òc e Steve BETTI, conselhier dau rector per li lengas regionali liejèron la dictada tracha d’un tèxto sieu. Es important de l’i participar, comptam sus de la vòstra venguda.
Aquest an serà Jan-Luc GAG, escrivan, òme de teatre, professor d’occitan-Lenga d’òc, que nen farà l’onor de legir un tròç d’una òbra sieua.
Lo cantaire provençau, Jan-Nové MABELLY, sòci de l’ieo-06, nos farà lo plasir de cantar e sonar après la dictada.
Lo monde son doncas convidats de venir au C.A.L Bòn-Viatge (sala dei cors de lenga, au terço plan) a comptar de 2 oras e mieja.
Per Niça siatz pregats de vos marcar pròche d’un animator de lenga (Joan-Pèire ò Anna-Maria S.G) e per Drap pròche Joan-Pèire Spies. Podètz finda vos marcar en bas d’article, basta laissar un messatge.
La dictada serà tanben duberta ai joves escolans que seguisson un ensenhament de lenga. Demandam ai sieus professors de pilhar lenga embé l’IEO-06 per si marcar.
Un abonament de 6 mes au jornal “LA SETMANA” serà regalat après tiratge au sòrt dei participants.
Coma l’an passat, la dictada s’acaberà per la remessa dei diplòmas e lo gòto de l’amistat. V’asperem numerós