Cars amics e sòcis,
De mai en mai, lo monde pilhan consciença que la sieu lenga e la sieu curtura son una riquessa. En gaire de temps lo vòstre Institut es passat d’un centenau de personas a 214 l’an passat e li chifras d’aquest an laissan augurar que serem alentorn de 250 d’aquí gaire, rapresentam 2000 sòcis emb’ai associacions afrairadi.
L’actualitat occitana pilha d’envam. Es rica, diversa, si vòu lo rebat de la vida associativa e lo demai. Cada jorn recevetz d’informacions de per lo site de l’IEO-06, site qu’a ja reçauput 282 276 visitors, avètz liejut 603 614 pàginas.
L’annada 2011 serà aquela de l’espandiment de la nòstra estructura. Avèm lo projèct de durbir un quint cors de lenga, per aquò faire un animator es a si formar.
Avèm besonh de CADA SÒCI per faire avançar li ideas aparadi per l’IEO. V’aperem toi a l’AG dau 15 de genoièr a 9 oras e mieja, sala dei quadrants solari a Coarasa (http://ieo06.free.fr/spip.php?article1995). L’AG es un moment-clau en la vida d’una associacion, e si devem de toi l’i èstre.
Per li nòstri lengas de França e/ò minorizadi, auguram un desfolopament dins l’ensenhament, lu medias, la creacion, la vida publica. Au mes de febrier dau 2010, l’IEO-06 escrivia a l’Inspector d’Acadèmia per demandar la dubertura d’una escòla bilinga en lo nòstre departiment e un pòste de conselhier pedagogic Lenga e Curtura regionali, demanda renovelada en decembre.
Ramentam que l’occitan es ja cò lenga nacionala en Espanha dins Catalonha tota per Val d’Aran e en li Valadas Occitani d’Itàlia, embé lu drechs e devèrs que van ensems. Que, se dins la Constitucion l’Article 75-1 ditz: ” Li lengas regionali apartenon au patrimòni de França.” (21 de julhet dau 2008), lo camin serà encara lòng per una vertadiera reconoissença de l’occitan (http://ieo06.free.fr/spip.php?article1991). Aquesta fraseta, meme s’es importanta, basterà pas a sauvar l’occitan. Après Carcassona lo 24 d’octòbre dau 2009, si devem d’obrar per faire espelir una lei “quadre” per li lengas de França (http://ieo06.free.fr/spip.php?article1999).
Comptam sus la vòstra participacion e lo vòstre investiment. Vos demandam tanben de pensar a faire societar d’amics que pensan que desfendre la lenga d’òc e la sieu cultura es aparar la diversitat en lo monde.
V’auguram una pròpi bòna annada 2011, ben granada e ben acompanhada.