Dimenjada dins la Val Maira.
L’IEO 06 organizèt lei 14 e 15 de mai una dimenjada a Draoníer (Dronero), dins la Val Maira. Li eriam 44 participants.
Leis amics occitanistas piemontés nos aculhèron ambé simplicitat e calor. Lotjats dins d’aubergas que proclaman clarament sa particularitat occitana e fan ventolar, davant lo bastiment, lo drapèu de la crotz d’òr, siam estats mai especialament espantats en visitant l’Espaci Occitan, associacion formada d’organismes d’interés public dau territòri occitan aupenc. Lei sieus objectius son la promocion lingüistica, sociala e economica dei populacions de lenga occitana.
La reconoissença de la lenga occitana per l’Estat italian en 1999 a permés la creacion e lo desvolopament d’aquest espaci. Recampa l’Institut d’Estudis, dispausant de centenaus de libres, de discs sarrats, de films, de musicas, documents preciós que se pòdon consultar per lo mejan dei tecnicas mai recentas, lo musèu « Sòn de lenga » – percors multi-mèdias que traversa Occitania tota, la sieu istòria, lei sieus tradicions culturalas e tanben lei servicis lingüistics metent a dispausicion dau public coma deis administracions de cors de lenga en linha, de reviraduras, d’activitats pedagogicas, d’ajudas ligüisticas e de toponimia – un servici economic, puei, titular de la marca « Tradicion dei Tèrras Occitanas » qu’encoratja la difusion d’aquesta marca en cò dei melhors productors per individualizar lei produchs tipics e de qualitat venent dau territòri dei valadas occitanas ; tanben, es promouguda la renaissença de la produccion artisanala.
Luenh de se replegar sus lo sieu terrador, leis occitanistas d’Itàlia se duerbon e escambian, non solament sus leis autrei regions occitanas de França e d’Espanha, mai tanben ambé eis autrei culturas minoritàrias d’Euròpa. Un exemple que nos fau meditar, de segur.
Andrieu