Cara amiga, car amic de l’ieo-06.
Lo 13 de novembre dau 2004, l’IEO-06, avia dubert un site per dialogar emb’au monde, per parlar dei nòstres projècts, per vos faire conoísser li nòstri activitats, per èstre mai pròche dei sòcis e pegar un pauc mai a l’actualitat.
Ancuei, 6 mes après dont nen siam ?
Avèm escrich 250 articles e lo chícol (coma la sòca). Mai d’un article cada jorn (1,38). Pensaviam pas escriure tant, e tant escambiar emb’au monde en gaire de temps. L’actualitat occitana es estada rica d’eveniments.
La tòca premiera dau site èra d’informar lu nòstres sòcis de l’actualitat occitana e d’aver un retorn sota forma de messatges en respòsta a l’article presentat. N’avetz mandat 350 messatges (1,40 per article). Aquí parier, n’escrivetz de mai en mai (3, 4 ò 5 messatges per lu darniers articles)
Siatz tanben de mai en mai numerós a venir visitar lo site. Tra 40 e 60 cada jorn(embé una mejana de 48 cada jorn). Ier siatz estats mai numerós embé 83 visitas e 80 visitors diferents. Despí 2 mes qu’avèm mes XiTi (l’espia en bas de pàgina), sabem qu’avèm augut 2425 visitas e qu’avètz liejut mai de 8500 pàginas : 90 pàginas de mejana cada jorn au mes de mars, 124 au mes d’abriu e 193 en aqueu principi de mai.
Avèm de visitors dau monde entier (54 país diferents, embé l’espanha qu’arriba en tèsta embé 100 vísitas, (n’aprofitan per saludar lu nòstres amics Catalans), lu Estats-Units après (60) e en terça posicion la Belgica(57). Vos mercejam per tot aquò e vos demandam de faire conoísser lo site ai amics vòstres.
Lu articles lu conoissetz, son aquí, a portada d’un « clic ».
Avèm vorgut escriure d’articles diferents que tòcan a tota la curtura occitana : ensenhament, receta de coïna, cançons, actualitat (teatre, conferenças, cinemà, libres…), mas finda l’actualitat que tòca a la lei d’orientacion per l’escòla e lu marrits còups que son fachs a l’occitan e ai autri lengas de França, ai ensenhaires capecians, professors d’escòla …
Mancan de segur de fòtos, per rendre l’article lo mai agradiu possible, mas lo temps defauta e tanben la nòstra banca de fòtos. Alora se n’avetz (pas en lu tiradors, mas numerisadi) que nen pòdon servir. Perque pas nos en mandar.
Cercam tanben de redactors, de gents que li agradan escriure en lenga ò en francés podetz sempre vos faire conoísser e nen prepauar lu vòstres tèxtos.
Ensems fem camin e si sentem sostenguts dins li nòstri orientacions de « política » curturala.
Autra caua, podetz finda n’ajudar se pilhatz la vòstra carta de sòci de l’ieo-06 : au mai serem numerós au mai aurem de pes pròche lu elegits per desfendre la lenga e la curtura nòstra.