En toi lu afogats d’istòria e de cultura niçardi, siam urós d’anonçar la parucion recenta e a fin non comerciala, de doi obratges de qualitat, publicats per li edicions Pro Civitate, premier un DVD « Nice Balades Architecture », de Françoise DUPLOUY, e segond un libre « 1860 Nice, la Caisse d’épargne et les banques », de Joseph DUPLOUY. Tenèm a precisar que toi lu beneficis dei vènditas son dedicats a d’òbras de benfasença sociala.
[bleu marine]
« Nice – Balades Architecture »
[/bleu marine]
Quauqu ans fa, Françoise DUPLOUY, conferenciera dei Vilas d’art e d’istòria, a fondat una associacion, Pro Civitate, organizant de sortidas-descuberta de la riquessa arquitecturala de Niça e alentorns.
En parallèl d’aquesta activitat, Françoise DUPLOUY, estent passionada de fotografia, virola d’aquí d’aià per la vila a l’espera dei tresòrs esconduts dau patrimòni niçard. Ne’n trai una banca fotografica de mai de 2000 imatges alestits en diaporamas e lu presenta benevolament ai pensionaris dei maions de retreta e espitaus qu’an pas ò pus la fortuna d’anar contemplar dau viu tota aquela beutat. E es davant lu sieus uelhs meravilhats e lusissents de bonur que li ven l’idea d’alestir, a partir de la sieu banca d’imatges, un DVD vendut ai amorós de Niça e regalat ai maions e associacions de personas a mobilitat reducha.
Lo DVD doble, titrat « Nice Balades Architecture », d’una durada totala de 2 oras 21, conten 15 documentaris de 10-15 minutas, cadun sus un tema precís, magnificament illustrat e acompanhat d’un comentari simple a portada de toi. Porretz partir a la descubèrta dei cloquiers, dei jardins, dei pòrtas, dei façadas, dei afrescs, dei mosaics e totplen mai. V’en laissam la sorpresa !
[rouge]
« 1860 Nice – La Caisse d’Epargne, les Banques »
[/rouge]
En quant au libre de Joseph DUPLOUY, ancian Tresorier-Pagaire-General dei Aups Maritimes, nen conta l’istòria de l’instalacion a Niça dei bancas e particularament de la Caissa d’Espranha, fondada per l’imperatritz de Russia Alexandra Feodorovna, dau temps dau plebiscite. Es l’ocasion de descurbir cu èra lo pòble niçard d’aqueu temps, dont s’estaíon lu rics e lu paures, que ròtle jugavan en la vida economica dau país e coma li inegalitats sociali menèron au vòte massiu en favor dau restacament.
Aqueu libre escrich de maniera simpla e istoricament fòrça ben documentat, es ornat esquasi a cada pàgina de splendidos dessenhs e fotografias e recensa, en pàgina 212, d’unu proverbis niçards ligats a l’argent, la riquèssa e la pauretat. Un pròpi bèl obratge da possedre per colleccion en la sieu biblioteca.