Aquest’an li amoras èran gròssi a Sent Pie (1) , una ocasion da pas mancar per si faire un pauc de geladina d’aquesta frucha roja que s’atròva en lu baranhàs.
« La sieu boca es una amora, tra doi gautas de carmin » cançon : La Pastora.
« La sieu boca es una amora, tra doi gautas de carmin » cançon : La Pastora.
Li amoras nen tendon lu braç, son bèli gròssi, n’avèm emplit doi « pirolets » (nom dei pichins pairòus que servion per lo lach) En gaire de temps lu avèm emplits d’un bòn quilò d’amoras cadun. Farem de geladina que dins la confitura li serion tròup de granetas dintre.
Après d’aver fach còire basta cinq-dètz minutas li amoras, passatz lo jus en un saqueton per lo desbarassar dei granetas. Mefi ! Asperatz que lo jus sigue frei ò chep.
Podètz laissar lo jus la nuech tota a s’escolar plan planin en lo saqueton ò alora l’ajudar a passar mai lèu en l’esquichant emb’ai vòstri mans.
Vuatz lo jus en una marmita e ajontatz lo sucre ; un quilò de sucre per quilò de jus. Laissatz còire 5 a 7 minutas s’emplegatz de « confisuc » ò de mai s’emplagatz de sucre fin normal.
Vos manca pas pus que de metre la geladina en de pòts pròpres, tèsta en bas per l’esterilizacion. La geladina es da manjar, d’autom ò d’invern, luenh dei vacanças, serà un rai de solèu roge que fiquerètz sus la lesca dau vòstre pan.
