Venèm de crear un profiu FB per l’IEO-06, sonat Ieo Aups-Maritimes, a l’adreiça :
https://www.facebook.com/ieo.aupsmaritimes
Adjudatz-nen de lo far viure.
L’IEO-06 arriba sus Facebook
Cars amics,
V’avèm anonçat ja, per aquesta rentrada, de novitats de tria, coma la creacion d’una escòla campanaire a Saorge, e la repilhada dei activitats numeroï e variadi que nen caracterizan.
Pura d’autri ideas continuan de grelhar dins lu sucs nòstres de lònga en ebulicion. E si siam dichs : vequí qu’anam si crear un profiu Facebook. Au jorn d’ancuei, mantu lo fan, per de motivacions mai que contrastadi, si lanhar d’un mau de tèsta, si fotografiar en lu salons dau Negresco ò temptar de sauvar la planeta. E nautres qu’avèm fòrça da dire e partajar, perqué proveriam pas d’emplegar aquel otís extraordinari d’un biais constructiu ?
De fach, una pàgina FB nen va permetre de nodar d’amistats novèli emb’au monde entier e d’alargar la difusion dei infòs dau siti nòstre, mas finda de nen tenir au fiu de cen que si debana d’en pertot en Occitània, dei diversi politicas e accions ligadi ai lengas… Mai encara, porrem charrar de tot cen que n’agrada, dau moment que lo farem en occitan de cada varianta, anonçar d’eveniments, contar de galejadas, escambiar de recetas de coïna, conselhar un film, una emission, pastrolhar dau temps que fa… ti sabi ieu ?
Clicatz sus la fòto per anar sus la pàgina FB de l’IEO-06
Aí, avètz ben capit. La pàgina FB serà duberta en toi lu amics de l’IEO-06 e cadun de nautres l’i porrà inserir ò partajar una infò, un imatge, una idea. Siguetz pas de simples espectators passius asperant de pitar, venetz actors de la dinamica IEO ! Auguetz minga vergonha, degun compterà li decas. Siam units aquí per far viure la lenga, pas per venir d’academicians.
Una remarca qualora, mas aquò ja lo sabètz : vi demandam simplament en li vòstri publicacions de respectar li valors de l’IEO-06, que son la laicitat, l’apolitisme, la dubertura d’esperit e lo rejet dei racismes, identitarismes ò separatismes de tota mena.
Darniera pichina informacion : venèm de crear una adreiça corriel directament ligada au còmpte FB, ieo06fb@yahoo.fr dont nen porretz jónher per tota requesta d’entrasenhas complementari, nòvas da far parèisser, eca…
Vequí, v’esperam numerós sus la pàgina nòstra per publicar, comentar, escambiar en lenga e partajar de grans moments d’amistat occitana.
A ben lèu sus FB !