Lo DCL es un diplòma d’Estat qu’atesta una competença de comunicacion operacionala en lenga. Es un diplòma que s’adreça en premièr a toi aquelu que vòlon faire valer la sieu conoissença de l’occitan dins lo quadre professional. Es dubèrt en toi, quau que sique lo nivèu de lenga ò d’estudis.
Gràcia a l’accion de monsur Steve BETTI, Conselhier dau Rector per li lengas regionali, lo DCL-Occitan (Diplòma de Competença en Lenga) si posquèt presentar en la nòstra acadèmia de Niça en mai dei acadèmias de Bordèu, Montpelhier e Tolosa. Que ne’n sigue aremerciat.
Dau sieu costat, l’IEO-06 metèt en plaça una formacion per lu sieus sòcis e emplissèt un dossier d’agradament en tant que centre de formacion a la Direccion regionala dau Travalh, de l’Emplec e de la Formacion Professionala.
En lo fra-temps la formacion comencèt per 9 sòcis de l’IEO-06. Cada setmana lo monde s’acampavan per una formacion tant teorica coma practica embé exercicis oraus e escrichs.
22 personas si marquèron au DCL-Occitan au centre d’exame de Niça Sòfa-Antipolís, 20 siguèron presenti lo 21 de mai, jorn dei espròvas.
Dimarç 24 de mai (a Niça) e dijòus 26 de mai (a Drap) cadun reçaupèt l’atestacion de participacion a l’estatgi de formacion au DCL-Occitan que marca la fin d’aquesta formacion.
D’après li nòstri informacions, lu 9 sòcis an toi fach bòna florida e an capitat lo DCL-Occitan : 3 auguèron lo nivèu C1 e 6 lo nivèu B2.
Un acamp es previst per melhorar encara la formacion sobretot sus la descuberta dei autres dialectes de la lenga d’òc. Lo diplòma es pan-occitan e d’unu documents (tant sonòros coma escrichs) pòdon èstre tant en gascon que lengadocian ò autres.
Se volètz presentar lo DCL-Occitan l’an que ven podètz ja pilhar lenga embé l’IEO-06 ò laissar un messatge en bas d’article.
Lo diplòma si declina en 5 nivèus : A2, B1-1, B1-2, B2, C1.
Veire lo referencial de certificacion çai-sota :
