Lu sòcis grassencs e colencs de l’IEO-06 s’acampèron a la Còla en aquesta fin de decembre per perpetuar la tradicion dei 13 dessèrts.
Coma de costuma siguèt un moment d’escambis, d’amistat e de convivialitat.
Aremerciam toi lu sòcis que l’i participèron que sigue per la sieu presença ò per lo dessèrt que presentèron.
Aremerciam tanben Miquèla e Rogier LEFRANC que nos mandèron quauqui fòtos dau rescòntre.
Coma lo sabètz la chifra 13 simbolisa la chifra dei convivas de la Cena.
Per memòria, e meme, se d’un luec a l’autre la tiera dei dessèrts es diferenta vos prepausam :
– lu 4 mandiants, lu 2 nogats e la pompa a l’òli.
Lu 4 mandiants :
– Li avelanas ò li notz (simbòlo dei Augustins)
– Li figas sequi (simbòlo dei Franciscans)
– Les améndolas (simbòlo dei Carmes)
– Lu azebics es a dire lu raïms/rasims secs (simbòlo dei Dominicans)
La pompa à l’òli (ò lo gibassier ò la fogassa en Arles)
Segon la tradicion, cau rompre la pompa a l’òli coma lo faguèt Crist per lo pan e non pas la talhar emb’au cotèu per fin de pas s’en anar en malora l’an d’après.
– Lo nogat blanc ai avelanas, pinhons ò pistachas.
– Lo nogat nègre au mèu fondut embé li améndolas
Podètz completar embé :
– De dàteris,
– De calissons,
– De pasta de codon,
– De portegals ò clementinas ò mandarinas,
– De poms e de peras d’invern,
– De raïm blanc (servan),
– De melon de Calènas (verdau),
– De fruchas confidi,
– De prunas de Brinhòlas…
Lo sabi a ja despassat lu 13 dessèrts, mas es un pauc coma dins lo pan-banhat a l’origina, en defòra dei elements de basa, lo monde metion cen qu’avian sota man.
Aüra a vautres de faire au vòstre. Mi dirètz …