Esto còup, mamet Denise vos prepaua de faire de nhòquis. Lu avèm tastats e si siam esperlecats. Fondion en la boca qu’es ren de lo dire ! S’avètz un pauc de temps, podetz finda vautres alestir lu nhòquis per 4 ò 5 personas.
Ingredient : 1,250 quilò de tantiflas, 250 gramas de farina tamiada, un òu, 2 culhers a sopa d’òli, condiments.
Alestiment : Metre a còire a la vapor li tantiflas embé la pèu, li pelar un còup cuechi, li escrasar en purea, laissar chepear.
Faire una fònt embé la farina sus la taula de la coïna, ajónher la purea de tantifla, batre l’òu embé l’òli, ajónher a la purea, mesclar e pastar l’ensems. Metre en bòcha e laissar pauar.
Partir la pasta en sièis. Rotlar un tròç de pasta sus d’un taulèu enfarinat per fins de ne’n faire un bodinet d’una espessor de circa un det. Talhar de morcèus de 1,5 cm. Rotlar cada morcèu emb’au det sus d’una forqueta. Un còup toi lu nhòquis rotlats, son lests a èstre mes dins l’aiga salada e bulhenta d’una marmita.
Lu nhòquis son cuechs quora remontan a la surfaça (circa 5mn de temps).
Escolatz, metetz en un plat caud e curbir de sauça ( burre, jus de dòba, sauça tomati…)
Esposcatz de parmesan gratat.
Bòn apetit e bòn pron vos fague !